لاہور(آئی این پی) گو کہ کوئٹہ گلیڈی ایٹر پی اسی ایل فائینل کا میچ ہار گئی تاہم کل کے میچ میں کوئی بھی غمگین نہیں تھا ۔ میچ کو خوب انجوائے کیاگیا اور کوئٹہ گلیڈی ایٹرز کے کپتان سرفراز احمد نے پاک فوج کو پیغام دیتے ہوئے کہا کہ وہ پاک فوج کے بےحد مشکور ہیں کہ ان کی وجہ سے یہ میچ بخوبی پر امن طریقے سے انجام کو پہنچا ۔ انہوں نے تمام سیکیورٹی اداروں اورپی سی بی کو بھی مبارکباد دی ۔ تفصیلات کے مطابق پاکستان سپر لیگ کے دوسرے ایڈیشن کی اختتامی تقریب کا باقاعدہ آغاز دہشت گردی کے خلاف اپنی جانوں کا نذرانہ پیش کرنے والے پاک فوج کے شہداء کو خراج عقیدت سے کیا گیا جس کے لئے پاک فوج کے پیرا ٹروپرز نے قذافی اسٹیڈیم میں اترنے کا شاندار مظاہرہ کیا۔پاک فوج کے شہداء کو خراج عقیدت پیش کرنے کے بعد گلوکار علی ظفر نے پی ایس ایل کا ٹائٹل سانگ پیش کر کے عوام کو جھومنے پر مجبور کردیا۔ علی ظفر کے بعد گلوکار فاخر نے اپنا مشہور زمانہ گانا ’تیرے بنا دل نا لگے‘ پیش کر کے شائقین کرکٹ کا لہو گرمایا۔ گلوکاروں کی شاندار پرفارمنس کے بعد دونوں ٹیموں کے کھلاڑی گراؤنڈ میں آئے اور ہاتھ ہلا کر شائقین کرکٹ کے نعروں کا جواب دیا۔ کھلاڑیوں نے مداحوں کے ساتھ سیلفیاں بھی بنوائیں۔