اسلام آباد(ایکسکلوزو رپورٹ )پاکستان سپر لیگ کے لاہور میں ہونے والے فائنل میں عمران خان کوضرور آنا چاہئے۔عمران خان کے پاکستان سپر لیگ کے فائنل میں استقبال خود کروں گا، پاکستان تحریک انصـاف کے رہنما اسد عمر اور نجم سیٹھی کا نجی ٹی وی کے پروگرام میں اظہار خیال۔ تفصیلات کے مطابق پاکستانی نجی ٹی وی کے پروگرام میں سوال پوچھے جانے پر
پاکستان تحریک انصاف کے رہنما اسد عمر کا کہنا تھا کہ عمران خان کو پاکستان سپر لیگ کے لاہور میں ہونے والے فائنل میں ضرورآنا چاہئے۔ ان کا کہنا تھا کہ یہ پاکستان کی کرکٹ کا ایک بہت بڑا دن ہو گا اور اس دن وہاں پاکستان کے عظیم کرکٹر عمران خان نہ ہوئے تو فائنل ادھورا لگے گا۔ اسد عمر نے بتایا کہ تحریک انصاف وزیرستان مارچ کے دوران ٹی 20ورلڈ کپ کا فائنل تھا مگر عمران خان اس سے لاعلم تھے جس پر میں نے عمران خان سے گلہ کرتے ہوئے کہا کہ ’’کپتان یہ کیا کر دیا، ٹی 20ورلڈ کپ کا فائنل مس کر دیا‘‘۔بعدازاں پروگرام میں شامل ہوتے ہوئے نجم سیٹھی کا کہنا تھا کہ انہوں نے پچھلے سال بھی عمران خان کو پاکستان سپر لیگ کے فائنل کیلئے مدعو کیا تھا مگر وہ نہ آئے جب کہ اس سال بھی وہ انہیں اپنی جیب سے ٹکٹ خرید کر دینےاور فائنل میں استقبال کرنے کیلئے تیار ہیں وہ ان کی گاڑی کا دروازہ خود کھولیں گے مگر سیاستدانوں کو چاہئے کہ وہ سیاست کو کرکٹ سے الگ رکھیں۔ان کا کہنا تھا کہ وہ عمران خان کی کرکٹ کے حوالے سے بات سننے کو خاص طور پر تیار ہیں ، عمران خان کی کرکـٹ کے حوالے سے تجاویز نہایت عمدہ اور مفید ہیں مگر بدقسمتی سے ماضی میں ان کی باتیں سنی نہیں گئیں۔ نجم سیٹھی نے خواہش کا اظہار کرتے ہوئے کہا کہ ہم ملک میں ریجنل کرکٹ منظم کرنا چاہتے ہیں کاش عمران خان ہمارا اس سلسلہ میں ہاتھ بٹائیں۔
