ڈھاکا(آن لائن) بنگلہ دیشی پولیس نے گرل فرینڈ کی حساس تصاویر سوشل میڈیا پر اپ لوڈ کرنے کے الزام میں قومی کرکٹر عرفات سنی کو گرفتار کر لیا ہے۔عرفات کی پرانی گرل فرینڈ نے پولیس سے دو ہفتے قبل شکایت کی تھی جس کے پیش نظر پولیس نے اتوار کو ڈھاکا کے نواحی علاقے امین بازار میں واقع کرکٹرکے گھر پر چھاپہ مار کر انہیں گرفتار کر لیا
۔30 سالہ بائیں ہاتھ کے باؤلر پر ان کی گرل فرینڈ نے ان کی حساس تصاویر سوشل میڈیا پر اپ لوڈ کرنے کا الزام عائد کیا ہے جہاں بنگلہ دیش میں سخت انٹرنیٹ قوانین کے سبب ایسا کرنا جرم تصور کیا جاتا ہے۔مقامی پولیس کے سربراہ جمال الدین میر نے اے ای پی سے گفتگو کرتے ہوئے کہا کہ عرفات کی گرل فرینڈ نے بتایا کہ کرکٹر نے ان کا ایک نقلی فیس بک اکاؤنٹ بنایا اور ان کی ذاتی تصاویر اس پر ڈال دیں جو انہیں انتہائی ناگوار اور ہتک آمیز لگیں۔پولیس افسر کے مطابق ہم نے انہیں گرفتار کر لیا ہے اور عدالت سے انہیں پانچ دن کیلئے ریمانڈ میں دینے کی درخواست کی ہے۔اگر عرفات سنی پر یہ جرم ثابت ہو جاتا ہے تو انہیں قانون کے تحت 14 سال جیل یا ایک کروڑ ٹکا جرمانہ ادا کرنا پڑ سکتا ہے۔ ابھی تک عرفات کا سا معاملے پر کوئی بیان سامنے نہیں آیا۔
