لاہور(آن لائن)پاکستان کی ٹیسٹ ٹیم کے کپتان مصباح الحق نے ہانگ کانگ ٹی ٹوئنٹی بلٹز کی ٹیم ہانگ کانگ آئس لینڈ یونائیٹڈ(ایچ کے آئی) سے معاہدہ کرلیا جہاں وہ ٹیم کی قیادت کریں گے۔ لیونین گلوبل اسپورٹس کی مالک اور پاکستان سپر لیگ (پی ایس ایل) کی چمپیئن ٹیم اسلام آباد یونائیٹڈ کی سربراہ آمنہ نقوی نے مصباح الحق کی ہانگ کانگ ٹی ٹوئنٹی لیگ میں شرکت کا اعلان کیا۔مصباح الحق اگلے ماہ ہونے والے ایونٹ پی ایس ایل میں اسلام آباد یونائیٹڈ کی قیادت کریں گے جس کے اختتام کے فوری بعد وہ ایچ کے آئی کی قیادت کرنے ہانگ کانگ پہنچ جائیں گے۔
ہانگ کانگ ٹی ٹوئنٹی بلٹز میں پانچ ٹیمیں شامل ہیں جس کے دوسرے سیزن کا آغاز 8 مارچ کو ہوگا اور 12 مارچ تک جاری رہے گا۔دوسری جانب ٹورنامنٹ میں پاکستان کے سابق کپتان شاہد آفریدی، سری لنکا کے کمارسنگاکارا اور ویسٹ انڈیز کے ڈیرن سیمی بھی معاہدوں پر دستخط کرچکے ہیں۔آسٹریلیا کے سابق کرکٹر اور ایچ کے آئی یونائیٹڈ کے کوچ ریان کیمبل نے معاہدوں پر بات کرتے ہوئے کہا کہ ‘کرکٹ کی دنیا کے مصباح جیسے کھلاڑی کی شرکت سے واضح ہورہا ہے کہ یہ ٹورنامنٹ کتنا وسیع ہورہا ہے اور ہمارے ارادے کتنے مضبوط ہیں’۔انھوں نے کہا کہ وہ ایک پیدائشی کپتان ہیں اور اسلام آباد یونائیٹڈ اور ایچ کے آئی یونائیٹڈ کو مزید قریب لانے کا موجب ہوں گے۔

موضوعات:مصباح الحق