راجکوٹ(آئی این پی) بھارت کے خلاف پہلے ٹیسٹ میچ میں انگلینڈ کی جو ٹیم کھیل رہی ہے اس میں 4 مسلمان کھلاڑی موجود ہیں۔انگلینڈ کے ٹیم کاشمار کرکٹ کی قدیم ٹیموں میں ہوتا ہے۔ کرکٹ کی شروعات انگلینڈ سے ہوئی اور یہاں اس کھیل پرہمیشہ گوروں کی حکمرانی رہی۔ انگلینڈ میں مختلف وقتوں میں مسلمان کرکٹرز نے اپنے کھیل سے متاثر کیا جن میں اویس شاہ، ساجد محمود،کبیر علی اور دیگر شامل ہیں۔ تاہم انگلینڈ نے راجکوٹ میں بھارت کے خلاف جس ٹیم کو اتارا اس میں چار مسلمان کھلاڑی شامل ہیں۔ یہ اپنی نوعیت کا انوکھا ریکارڈ ہے۔ انگلینڈ کی ٹیم میں حسیب حمید نے ڈیبیو کیاہے۔ انھیں جونئیر جیفری بائیکاٹ بھی کہا جارہاہے۔ اس ٹیم میں معین علی بھی موجود ہیں۔ معین علی کا شمار انگلینڈ کے مستند بیٹسمینوں میں ہوتاہے۔ ان کی آف اسپین بالنگ بھی انگلینڈ کیلیے اہم رہی ہے۔ عادل رشید انگلینڈ کی ٹیم میں موجود تیسرے مسلمان کھلاڑی ہیں۔ وہ لیگ بریک بالنگ کرواتے ہیں اور ٹیم کے مرکزی اسپنرہیں۔ انگلینڈ کی ٹیم میں شامل چوتھے مسلمان کھلاڑی ظفر انصاری ہیں۔ ظفر بائیں ہاتھ سے اسپن بالنگ کرتے ہیں اور ایک ٹیسٹ میچ کھیل چکے ہیں۔