کراچی(نیوز ڈیسک)پاکستان کرکٹ میں ایک بار پھر ’کوچ ہٹاو¿، ٹیم بچاو¿‘ مہم شروع ہوگئی، سابق ٹیسٹ کرکٹرز جاوید میانداد اور سرفراز نواز نے وقار یونس کی فوری رخصتی کو ملکی کھیل کے مفاد میں بہترین قرار دے دیا۔تفصیلات کے مطابق انگلینڈ کے ہاتھوں مسلسل دوسرے ون ڈے میں ناقص بیٹنگ، شرمناک شکست اور پلیئنگ الیون کا ذاتی پسند ناپسند پر انتخاب سابق اسٹارز کو ناراض کر گیا، وقار یونس کو ہیڈ کوچ کے عہدے سے ہٹانے کا مطالبہ بھی سامنے آگیا ہے۔ جاوید میانداد اور سرفراز نواز نے موجودہ صورتحال کا براہ راست ذمہ دار وقار یونس کو ٹھہرایا ہے، جاوید میانداد نے کہا کہ اس وقت پلیئنگ الیون کا انتخاب صرف اور صرف وقار یونس کی ذاتی پسند نہ پسند کی بنیاد پر کیا جا رہا ہے، اس لیے ان ناکامیوں کی ذمہ داری بھی ان پر ہی عائد ہوتی ہے، اوپنر احمد شہزاد کو بھی اسی پسند ناپسند کا نشانہ بنایا گیا، میرا سلیکشن کمیٹی سے فقط اتنا سوال ہے کہ اگر احمد شہزاد کسی ڈسپلنری ایشو میں ملوث ہیں تو پھر انھیں ون ڈے میں نظر انداز اور ٹوئنٹی 20 میں کیوں کھلایا جاتا ہے؟ جاوید میانداد نے کہا کہ میں سمجھتا ہوں کہ نئے کوچ کی تعیناتی کا یہی مناسب وقت ہے۔دوسری جانب سابق فاسٹ بولر سرفراز نواز نے کہاکہ جب بھی وقار یونس کوچ بنیں ٹیم تنازعات میں الجھ جاتی ہے، اس لیے انھیں فوری طور پر ہٹانا ہی بہتر ہوگا۔ دوسری جانب چیف سلیکٹر ہارون رشید نے کہاکہ احمد شہزاد کے باہر بیٹھنے کی وجہ ڈسپلنری ایشوز نہیں بلکہ انھیں ون ڈے الیون میں جگہ نہ بننے کی وجہ سے ڈراپ کیا گیا ہے، انھوں نے دعویٰ کیا کہ وقار یونس کے خیال میں احمد شہزاد کی الیون میں جگہ ہی نہیں بنتی ، جب جگہ ہوگی تو موقع دیا جائے گا۔جب چیف سلیکٹر سے جارح مزاج بیٹسمین کے ٹوئنٹی 20 میچز میں کھیلنے کے امکانات کے بارے میں سوال کیا گیا تو انھوں نے کہا کہ ہمارا کام 15 پلیئرز منتخب کرنا ہے میدان میں اتارنے کا فیصلہ ٹیم مینجمنٹ کرے گی، عمر اکمل کی ٹوئنٹی 20 اسکواڈ میں شمولیت کے حوالے سے ہارون رشید نے کہا کہ ان کا معاملہ پی سی بی چیئرمین شہریار خان کے پاس ہے، ابھی اس بارے میں کوئی فیصلہ نہیں کیا گیا۔