نیو دہلی(نیوزڈیسک) اسپاٹ فکسنگ اور کرپشن الزامات کے بعد انڈین پریمیئر لیگ کو ایک اور بڑا دھچکا لگا ہے اور لیگ کے مرکزی اسپانسر پیپسی نے بی سی سی آئی کو اسپانسر شپ سے دستبردار ہونے سے آگاہ کردیا ہے۔پیپسی نے 2012 میں آئی پی ایل کیلئے ہندوستانی کرکٹ بورڈ(بی سی سی آئی) سے پانچ سالہ معاہدہ کیا تھا لیکن وہ معاہدے کی مدت کے خاتمے سے قبل ہی اس سے دستبردار ہونا چاہتے ہیں۔ذرائع کے مطابق پیپسی کا کہنا ہے کہ آئی پی ایل کی وجہ سے کھیل کی ساکھ متاثر ہوئی ہے اور وہ اس لیگ سے الگ ہونا چاہتے ہیں۔ادھر بی سی سی آئی نے پیپسی کی جگہ لیگ میں دلچسپی رکھنے والے دیگر بڑے اسپانسرز سے بات چیت شروع کردی ہے۔تاہم بی سی سی آئی کے ایک سینئر عہدیدار نے بتایا کہ پیپسی نے لیگ سے الگ ہونے کی خواہش ظاہر کی ہے لیکن اس کی وجہ کرپشن یا دیگر معاملات نہیں، وہ اپنی ذاتی وجوہات کی بنا پر لیگ سے الگ ہونا چاہتے ہیں۔تاہم اس حوالے سے پیپسی کے حکام سے رابطہ ممکن نہیں ہو سکا