اسلام آباد (نیوز ڈ یسک) اسلام آباد میں ایک شہری نے شوال کے چاند کے اعلان کے حوالے سے اسلام آباد ہائیکورٹ میں ایک غیر معمولی درخواست دائر کر دی ہے۔
درخواست گزار نے عدالت سے استدعا کی ہے کہ رویت ہلال کمیٹی کو ہدایت جاری کی جائے کہ چاند نظر آنے کی صورت میں اس کا اعلان جلد از جلد کیا جائے۔ شہری کا مؤقف ہے کہ چاند کے اعلان میں تاخیر کے باعث لوگوں کو مشکلات کا سامنا کرنا پڑتا ہے۔درخواست میں کہا گیا ہے کہ اکثر اوقات چاند کا اعلان دیر سے ہونے کی وجہ سے کئی افراد تراویح ادا کر لیتے ہیں جبکہ بعد میں عید کا اعلان ہو جاتا ہے۔ اس کے علاوہ رات گئے اچانک اعلان ہونے سے مارکیٹوں میں خریداروں کا رش بڑھ جاتا ہے جس سے انتظامیہ کے لیے امن و امان کی صورتحال کو سنبھالنا مشکل ہو جاتا ہے۔
شہری نے عدالت سے یہ بھی درخواست کی ہے کہ عید کی خریداری کے لیے مخصوص بازاروں کے علاوہ دیگر مارکیٹوں کو بند رکھنے سے متعلق بھی احکامات جاری کیے جائیں تاکہ رش اور بے ترتیبی سے بچا جا سکے۔
