کراچی(آن لائن) پاکستان ویمن کرکٹ ٹیم نے پہلے ٹی ٹوینٹی میچ میں بنگلہ دیش کی ٹیم کو 28 رنز سے شکست دے دی۔ پاکستان کی ویمن ٹیم نے پہلے ٹوینٹی ٹوینٹی میں بنگلہ دیش کو جیت کے لیے 125 رنز کا ہدف دیا۔ ہدف کے تعاقب میں بنگلہ دیش کی ٹیم بیس اوورز میں 7 وکٹوں کے نقصان پر 96 رنز ہی بنا پائی۔ بنگلہ دیش کی جانب سے عائشہ رحمان اور فرگانہ حقی نے 23،23 اور رومانہ احمد 22 رنز بنا کر نمایاں رہیں۔ پاکستان کی جانب سے انعم امین نے دو کھلاڑیوں کو آﺅٹ کیا۔کراچی کے ڈیفنس ہئاوسنگ اتھارٹی سٹیڈیم میں پہلے ویمن ٹی 20 میں پاکستانی ٹیم نے بنگلہ دیش کے خلاف ٹاس جیت کر پہلے بیٹنگ کا فیصلہ کیا اور مقررہ 20 اوورز میں 5 وکٹوں کے نقصان پر 124 رنزبنائے۔بسمعہ معروف 65 رنز بناکر ٹاپ سکورر رہیں جبکہ جویریہ خان نے 44 رنز کی اننگز کھیلی۔قومی ٹیم کی پہلی وکٹ ایک رنزپر ہی گرگئی تھی جب مرینہ اقبال ایک رن بنا کر رن آﺅٹ ہوئیں، پہلی وکٹ جلد گر جانے کے بعد جویریہ خان اور بسمعہ معروف نے شاندار بیٹنگ کرتے ہوئے دوسری وکٹ کی شراکت میں 87 رنز کی شراکت قائم کی۔ جویریہ 44 رنز کی اننگز کھیل کر پویلین لوٹیں ، بسمعہ معروف نے ذمہ دارانہ بیٹنگ کاسلسلہ جاری رکھا اور ٹی ٹوینٹی کیرئیر کی چوتھی نصف سنچری سکور کی۔ندا ڈار اور ارم جاوید نے چار چار جبکہ اسماویہ اقبال نے ایک رن بنایا، بسمعہ پینسٹھ رنز بناکر ناٹ آﺅٹ رہیں اور انہیں میچ کی بہترین کھلاڑی قرار دیا گیا۔ بنگلہ دیش کی ناہیدہ اختر نے 2 وکٹیں حاصل کیں۔