اسلام آباد(نیوز ڈیسک )پاکستان کرکٹ بورڈ کے سربراہ شہر یار خان نے پاکستان سپر لیگ کے یو اے ای میں انعقاد کے فیصلے کا دفاع کرتے ہوئے کہا ہے کہ بورڈ نے عالمی سٹار کھلاڑیوں کو متوجہ کرنے کیلئے غیر ملکی مقام کا انتخاب کیا ¾پی ایس ایل کے پہلے سیزن کا انعقاد پاکستان میں کرتے تو عالمی کھلاڑی دلچسپی نہ لیتے۔ اسی وجہ سے ہم نے یو اے ای کا انتخاب کیا لیکن مستقبل میں ہم مرحلہ وار پی ایس ایل کو پاکستان منتقل کر دیں گے ¾اگلے پی ایس ایل ایڈیشن میں ہم ایک، دو میچ پاکستان میں منعقد کرائیں گے۔ایک انٹرویو میں چیئر مین پی سی بی نے بتایا کہ سپر لیگ میں تقریباً 120 کھلاڑیوں سے دلچسپی دکھائی ہے، جن میں سے 24 کو لیگ کیلئے منتخب کیا جا ئےگا۔پاکستان میں عالمی کرکٹ کی بحالی کے حوالے سے پرامید شہریار نے کہا کہ دہشت گردوں کے خلاف فوجی آپریشن درست سمت میں جا رہا ہے ، امید ہے کہ اس کی وجہ سے ملک میں دہشت گردی ختم ہو جائے گی۔ہم ملک میں عالمی کرکٹ کی بحالی کیلئے کوشش کر رہےہیں۔ امید ہے کہ مستقبل میں ملکی سیکیورٹی مزید بہتر ہو گی۔ایک سوال کے جواب میں شہریار نے کہا کہ سلمان بٹ، محمدآصف اور محمد عامر کو عالمی کرکٹ میں واپس آنے سے پہلے مختلف مرحلے طے کرنے ہوں گے۔انڈیا کے ساتھ باہمی کرکٹ سیریز کے حوالے سے پی سی بی چیئرمین نے بتایا کہ وہ تاحال بی سی سی آئی کے جواب کے منتظر ہیں۔