اسلام آباد(نیوزڈیسک)پاکستان کرکٹ بورڈ (پی سی بی )کے ملازمین مشکلات کا شکار ہوسکتے ہیں کیونکہ پی سی بی نے اخراجات میں کمی کیساتھ ساتھ 900ملازمین میں سے 200کو فارغ کرنے کا فیصلہ کیاہے۔چیئرمین پی سی بی شہریار خان نے میڈیا کو بتایا کہ پی سی بی نے اخراجات میں کمی کرنے اور ملازمین کی تعداد کم کرنے کا منصوبہ بھی زیر غور ہے ۔انہوں نے کہاکہانٹرنیشنل اور ڈومیسٹک کرکٹ کوکرکٹ افیئرز ڈیپارٹمنٹ میں ضم کردیا جائے گا ۔سابق ٹیسٹ کیپٹن انتخاب عالم ڈومیسٹک کرکٹ کے ڈائریکٹر جبکہ ذاکر خان انٹر نیشنل کرکٹ امور کی دیکھ بھال کرتے ہیں ۔پی سی بی ذرائع کے مطابق عثمان واہلہ اور علی ضیاء کو بطور جنرل منیجرز کرکٹ افیئرز کی نئی ذمہ داریاں سونپی جارہی ہیں ۔ذرائع کا مزید کہناہے کہ تقریباً 200پی سی بی ملازمین کو فارغ کرنے کا فیصلہ کیاگیاہے ۔انہوں نے بتایاکہ 28کھلاڑیوں کو حالیہ نیا سینٹرل کنٹریکٹ دیاگیا ۔ان کرکٹرز کی تنخواہوں میں معقول اضافہ اور دیگر مراعات بھی دی گئیں۔
شہر یار خان نے کہاکہ دسمبر میں پاک بھارت کرکٹ سیریز نہ ہونے سے بورڈ کو 80سے 90ملین ڈالر کا خسارہ اٹھانا پڑا ۔یاد رہے کہ پاکستان کرکٹ بورڈ کے تقریباً 9سو ملازمین ہیں جن میں سے بیشتر بورڈ ہیڈکوارٹر اور نیشنل کرکٹ اکیڈمی لاہور میں بھاری مشاہیر پر کام کررہے ہیں۔