اسلا م آبا د (نیوز ڈ یسک)پاکستان تحریک انصاف نے ملک بھر میں پہیہ جام ہڑتال کرنے کا اعلان کر دیا ہے۔ یہ اعلان خیبرپختونخوا حکومت کے معاونِ خصوصی شفیع جان نے نجی ٹی وی چینل سماء کے پروگرام ’’دوٹوک‘‘ میں گفتگو کے دوران کیا۔شفیع جان کے مطابق 8 فروری 2026 کو پورے ملک میں پہیہ جام اور شٹر ڈاؤن ہڑتال کی جائے گی۔ ان کا کہنا تھا کہ خیبرپختونخوا کے عوام موجودہ وزیراعلیٰ سہیل آفریدی کو ایک امید کی کرن کے طور پر دیکھ رہے ہیں اور پارٹی اپنی سیاسی جدوجہد کو مزید منظم انداز میں آگے بڑھائے گی۔

دوسری جانب پاکستان تحریک انصاف کے چیئرمین بیرسٹر گوہر نے تحریکِ تحفظِ آئینِ پاکستان کی قومی کانفرنس سے خطاب کرتے ہوئے سیاسی قوتوں کو دوبارہ ایک میز پر بیٹھنے کی دعوت دی۔ ان کا کہنا تھا کہ ملک میں نہ آئین اپنی اصل حالت میں نظر آتا ہے اور نہ ہی عدلیہ آزاد دکھائی دیتی ہے۔بیرسٹر گوہر نے کہا کہ جو ججز مزاحمت کر سکتے تھے وہ نظام سے باہر ہو چکے ہیں، جبکہ عوام کا عدالتی نظام سے اعتماد تقریباً ختم ہو چکا ہے۔ انہوں نے اعتراف کیا کہ گزشتہ دو برسوں میں پارٹی اپنے تمام مقاصد حاصل نہیں کر سکی، تاہم اس کے باوجود جمہوریت کے تحفظ کے لیے جدوجہد جاری رکھی جائے گی۔