لاہور(نیوز ڈیسک) میر ظفر اللہ خان جمالی کو پی ایچ ایف کا سرپرست بنانے کا امکان ہے، ساتھ ہی انھیں وزیر اعظم کے ہاکی مشیر کی ذمہ داری بھی مل سکتی ہے۔اس صورت میں قومی سلیکشن کمیٹی اور جونیئر ٹیم مینجمنٹ میں ردوبدل ہوسکتا ہے، طاہر زمان سے جونیئر ٹیم کے منیجر کا عہدہ واپس لے کر پاک آرمی کے ایک سابق آفیسر کے حوالے کیا جائے گا ، نوید عالم، خواجہ محمد جنید اور خالد بشیر سمیت متعدد سابق اولمپئنز کو بھی ذمہ داریاں ملیں گی۔ تفصیلات کے مطابق ورلڈ ہاکی لیگ میں ٹیم کی شرمناک کارکردگی کے بعد قومی کھیل میں اٹھنے والا طوفان کسی بھی طرح تھمنے کا نام ہی نہیں لے رہا۔وزیر اعظم نواز شریف نے بریگیڈیئر(ر) خالد کھوکھر کو پاکستان ہاکی فیڈریشن کا صدر مقرر کیا،جنھوں نے سابق اولمپئن شہباز احمد سینئرکو سیکریٹری، رشید جونیئر کو چیف سلیکٹر اور طاہر زمان کو جونیئر ہاکی ٹیم کا ہیڈ کوچ مقرر کیا تھا۔ پی ایچ ایف کے سابق صدر میر ظفر اللہ خان جمالی نے ان تقرریوں کے خلاف بھر پور احتجاج کرتے ہوئے موقف اختیار کیا تھا کہ وزیر اعظم نے انھیں قومی کھیل کو تباہی سے نکالنے کیلیے موثر کردار ادا کرنے کے لیے کہا تھا، میاں نواز شریف سے ملاقاتوں میں یہ طے ہوا تھا کہ فیڈریشن کے صدرکی تقرری کے بعد باقی عہدے ان کی مشاورت سے دیے جائیں گے لیکن ایسا نہیں ہوا۔ذرائع کے مطابق نئے سیکریٹری، ٹیم مینجمنٹ اور سلیکشن کمیٹی کے اعلان کے بعد میر ظفر اللہ خان جمالی نے وزیر اعظم سے فوری طور پر رابطہ کر کے پی ایچ ایف میں ہونے والی تبدیلیوں کے بارے میں آگاہ کیا۔ ذرائع کے مطابق وزیر اعظم میاں نواز شریف نے میر ظفر اللہ خان جمالی کو اپنا ہاکی مشیر اور پی ایچ ایف کا پیٹرن بنانے کا فیصلہ کیا ہے، نوٹیفکیشن چند روز تک متوقع ہے۔ مزید معلوم ہوا ہے کہ میر ظفر اللہ خان جمالی کو فیڈریشن میں سرپرست کا عہدہ ملنے کی صورت میں قومی سلیکشن کمیٹی اور ٹیم مینجمنٹ میں تبدیلیوں کا بھی امکان ہے۔ذرائع کے مطابق طاہر زمان سے ٹیم منیجر کا عہدہ لے کر پاک فوج کے سابق افسر کو دینے کا قوی امکان ہے تاہم طاہر زمان کو ہیڈ کوچ کے عہدے پر بدستوربرقرار رکھا جائے گا۔مزید معلوم ہوا ہے کہ میر ظفر اللہ خان جمالی کے پیٹرن کا نوٹیفکیشن جاری ہونے کے بعد نوید عالم، خواجہ محمد جنید، خالد بشیر، منظور جونیئر اور منظور الحسن کو پی ایچ ایف میں اہم ذمہ داریاں مل جائیں گی۔