لاہور(نیوزڈیسک) پاکستان کرکٹ بورڈ نے قومی کرکٹرز کو ڈب سمیش ویڈیوز سے دور رہنے کی ہدایت کر دی ہے۔ پی سی بی نے کھلاڑیوں کو ہدایت کی ہے کہ غیر ملکی دوروں کے دوران وہ کسی بھی طرح کی ڈب سمیش ویڈیوز پوسٹ نہ کریں۔ یہ فیصلہ کھلاڑیوں کو تنازعات سے بچانے کے لئے کیا گیا ہے۔ خیال رہے کہ دورہ سری لنکا کے دوران پاکستانی کرکٹر شعیب ملک نے اپنی اہلیہ ثانیہ مرزا کے ساتھ مل کر ڈب سمیش ویڈیو بنائی تھی۔ ڈب سمیش میں شعیب ملک کے علاوہ مختار احمد، محمد عرفان، بابر اعظم سمیت دیگر کرکٹرز بھی ڈانس کرتے دکھائی دیئے۔ اس ویڈیو پر بھارت کے یوراج سنگھ نے تبصرہ کیا تھا کہ شعیب اور ثانیہ بہترین کھلاڑی لیکن بدترین ڈانسر ہیں۔ شعیب ملک نے اس پر یوراج سنگھ کو چیلنج کیا تھا۔ یہ سارا معاملہ ٹویٹر کے ذریعے چلتا رہا۔ بعد ازاں شعیب ملک کی معروف باکسر عامر خان اور ان کی اہلیہ کے ساتھ بنائی گئی ڈب سمیش کے خوب چرچے رہے۔