کراچی (نیوز ڈیسک) آئی بی ایس ایف ورلڈ ٹیم اسنوکر چیمپئن شپ کا کراچی میں آغاز ہوگیا ، ایونٹ میں پاکستان سمیت بارہ ممالک کی ٹیمیں شریک ہیں ، پاکستان ٹو نے ابتدائی میچ میں قطر کو شکست دیدی جبکہ پاکستان سکس کوشکست کا سامنا کرنا پڑا ، کراچی کے مقامی ہوٹل میں شروع ہونے والی ورلڈ ٹیم اسنوکر چیمپئن شپ میں پاکستان سمیت بارہ ممالک کی ٹیمیں حصہ لے رہی ہیں ۔ پاکستان نے ایونٹ کیلئے نو ٹیموں کو میدان میں اتارا ہے ۔ شہرام چنگیز ی اور بابر مسیح پر مشتمل پاکستان ٹونے پہلے میچ میں قطر ٹو کیخلاف چار ایک سے فتح حاصل کی ۔ بابر مسیح کو پہلے فریم میں شکست ہوئی تاہم اس کے بعد پاکستانی جوڑی نے اگلے چاروں فریمز جیت کر کامیابی حاصل کرلی ، محمد سلطان اور آگاش رفیق پر مشتمل پاکستان سکس ٹیم کو پہلے میچ میں بحرین ون کیخلاف چار ایک فریمز سے شکست ہوئی ۔