ڈبلن(نیوز ڈیسک) آئی سی سی ورلڈ ٹی 20 کوالیفائر ٹورنامنٹ کے دونوں سیمی فائنلز ہفتہ کو ڈبلن میں کھیلے جائیں گے۔ ٹورنامنٹ کے پہلے سیمی فائنل میں ہانگ کانگ اور سکاٹ لینڈ کی ٹیمیں ڈبلن میں آمنے سامنے ہوں گی سکاٹ لینڈ نے گروپ بی میں ٹاپ پوزیشن حاصل کرکے براہ راست سیمی فائنل کےلئے کوالیفائی کیا جبکہ ہانگ کانگ نے پہلے کوالیفائنگ پلے آف میں افغانستان کو سنسنی خیز مقابلے کے بعد 5 وکٹوں سے شکست دے کر سیمی فائنل تک رسائی حاصل کی۔ دوسرے سیمی فائنل میں آئرلینڈ اور ہالینڈ کی ٹیمیں اسی میدان میں نبرد آزما ہوں گی۔ میزبان ٹیم آئرلینڈ نے بھی گروپ اے میں پہلی پوزیشن حاصل کی براہ راست سیمی فائنل میں جگہ بنائی جبکہ ہالینڈ نے دوسرے کوالیفائنگ پلے آف میں نمیبیا کو ہرا کر سیمی فائنل کےلئے کوالیفائی کیا۔ ٹورنامنٹ کا فائنل 25 جولائی کو کھیلا جائے گا۔