اسلام آباد(نیوز ڈیسک) سابق عالمی چیمپئن جہانگیر خان کی جانب سے ملک میں باصلاحیت اور ابھرتے ہوئے کھلاڑیوں کو سامنے لانے کے لیے کاوشیں جاری ہیں، نئے چیمپئن تلاش کرنے کے پروگرام کے تحت زیر تربیت 6 جونیئر کھلاڑی ملائیشیا جارہے ہیں جہاں وہ پیر سے شروع ہونے والے پینانگ انٹرنیشنل ٹورنامنٹ میں شرکت کریں گے۔ میڈیا سے گفتگو کرتے ہوئے کہا کہ ان کھلاڑیوں کو انٹرنیشنل ایونٹس میں شرکت کے مواقع فراہم کرنے کا مقصد تجربے میں اضافہ کرنا ہے، غیرملکی دوروں سے ان میں اعتماد بھی آئے گا۔انھوں نے کہا کہ میری کوشش اور خواہش ہے کہ پاکستان اسکواش میں اپنا کھویا ہوا عالمی مقام دوبارہ حاصل کرے جس کیلیے نئے اور باصلاحیت کھلاڑیوں کو سامنے لانا ضروری ہے، اس ضمن میں خصوصی پروگرام کے تحت ملک بھر سے نئے ٹیلنٹ کا انتخاب کرکے انھیں تمام تر سہولیات فراہم کرتے ہوئے تربیت دینے کا سلسلہ جاری ہے،امید ہے کہ اس منصوبہ بندی کے نتیجے میں پاکستان کو عالمی سطح کے کھلاڑی میسر آسکیں۔یکم تا 6 جون تک شیڈول انٹرنیشنل جونیئر ایونٹس میں عباس شوکت انڈر19 ایونٹ میں شرکت کریں گے، 3 کھلاڑی منصور زمان، مہران جاوید اور کاشف آصف انڈر17 ایونٹ کا حصہ بنیں گے، عون عباس انڈر 15 ایونٹ میں اپنی صلاحیتوں کی جانچ کرائیں گے جبکہ حطیفہ ابراہیم انڈر 11 ایونٹ میں کارکردگی کا امتحان دیں گے۔ جہانگیر خان کی زیر نگرانی تربیت پانے والے ان کھلاڑیوں کا انتخاب اہلیت کی بنیاد پر کیا گیا ہے۔ پروگرام کے ڈائریکٹر سعید خان نگران اور آصف خان کوچ کی حیثیت سے ملائیشیا جارہے ہیں۔