دبئی (نیوز ڈیسک) سابق ورلڈ چیمپئن ڈیوڈ ہائی کو دبئی میں دھوکہ دہی کے الزام میں پولیس نے گرفتار کرلیا ہے اور ان کا پاسپورٹ بھی ضبط کیا جاچکا ہے۔34سالہ باکسر نے یو اے ای میں جائیداد کی خریداری کی تھی اور اس کیلئے3لاکھ 41ہزار ڈالرز کا چیک دیا تھا جو کہ باو¿نس ہوا جس پر ان کی بیرون ملک سے دبئی انٹرنیشنل ایئرپورٹ آمد پرپولیس نے انہیں گرفتار کرلیا اور ان کا پاسپورٹ بھی ضبط کرلیا گیا۔پاسپورٹ ضبط ہونے کے سبب باکسر کی رواں ہفتے کے دوران برمنگھم میں ہونے والے ایک مکسڈ مارشل آرٹس ایونٹ میں شرکت بھی ممکن نہیں رہی ہے۔ دلچسپ امر یہ ہے کہ ڈیوڈ نے جس کمپنی کو دھوکہ دینا چاہا وہ حکومت کی تعمیراتی فرم ہے۔ڈیوڈ ہائی کا کہنا ہے کہ چیک باو¿نس ہونے کی وجہ ان کی غلطی نہیں۔ یہ چیک میرے دبئی آنے سے چار روز قبل ہی بینک میں جمع کروایا گیا جبکہ اسے میری خریدی ہوئی جائیداد کی تکمیل پر پیش کیا جانا تھا اور اس میں ابھی چند ہفتے باقی ہیں۔ انہوں نے کہا ہے کہ وہ حکومت سے پورا تعاون کریں گے، ان کے پاس اپنے موقف کو ثابت کرنے کیلئے ثبوت موجود ہیں، اس لئے امکان ہے کہ یہ معاملہ جلد طے پاجائے گا۔