کولمبو (نیوز ڈیسک)کرکٹ سری لنکا کے آفیشلز کا کہنا ہے کہ پاکستانی ٹیم رواں برس جون اور جولائی میں سری لنکا کیخلاف تین ٹیسٹ،پانچ ون ڈے اور دو ٹی ٹوئنٹی انٹرنیشنل میچوں پر مشتمل مکمل سیریز کھیلے گی۔ کم و بیش تصدیق شدہ شیڈول کے مطابق پاکستانی ٹیم دورے کا آغاز گیارہ سے تیرہ جون تک کولمبو میں سائیڈ میچ سے کرے گی۔ پہلا ٹیسٹ سترہ جون سے گال، دوسرا پچیس جون سے پی سروانا مٹو،کولمبو اور تیسرا تین جولائی سے آر پریماداسا اسٹیڈیم ،کولمبو میں شروع ہوگا۔ ون ڈے سیریز کے میچز بالترتیب گیارہ جولائی کو ڈمبولا، پندرہ جولائی کو پالیکلے ،انیس اور بائیس جولائی کو کولمبو اور چھبیس جولائی کو ہمبن ٹوٹا میں کھیلے جائیں گے۔ سیریز کے دونوں ٹی ٹوئنٹی میچز کا انعقاد کولمبو میں تیس جولائی اور یکم اگست کو ہو گا۔