نیپیئر(نیوز ڈیسک) پاکستان کرکٹ ٹیم پیرکوبرسبین سے نیپیئر پہنچ گئی۔ جہاں بدھ کو ورلڈکپ میں مصباح الیون چوتھا میچ متحدہ عرب امارات کے خلاف کھیلے گی۔قومی کرکٹ ٹیم نے اتوار کو برسبین میں ورلڈکپ میں پہلی کامیابی حاصل کرلی۔ مصباح الیون برسبین سے نیوزی لینڈ کے شہر نیپیئر پہنچ گئی۔ جہاں بدھ کو میگا ایونٹ میں ان کا چوتھا میچ متحدہ عرب امارات سے ہوگا۔ٹیم ذرائع کے مطابق نیپیئر پہنچنے کے بعد کھلاڑیوں نے ہوٹل میں آرام کیا، قومی ٹیم میچ کی تیاری کیلئے نیلسن پارک میں ٹریننگ کرے گی، ٹریننگ سے قبل کپتان مصباح الحق پریس کانفرنس بھی کریں گے، گرین شرٹس پول بی میں دوپوائنٹس کے ساتھ چھٹے نمبرپرہیں، متحدہ عرب امارات کیخلاف بڑے مارجن سے فتح انہیں پول میں مزید اوپرلے جائے گی، پاکستان ٹیم اپنے پانچویں میچ میں سات مارچ کوآکلینڈ میں جنوبی افریقہ کے مدمقابل آئے گی۔ ٹیم انتظامیہ کا کہنا ہے کہ زمبابوے کیخلاف فتح سے کھلاڑیوں کا اعتماد بحال ہوا ہے اور وہ یواے ای کے ساتھ بڑا اسکور کرکے نیٹ رن ریٹ بہتر بنانے کے لئے پرعزم ہیں۔قومی ٹیم منگل کو پریکٹس کے دوران بیٹنگ اورفیلڈنگ کی بہتری پر خاص توجہ دے گی اور زمبابوے کے خلاف میچ میں کی گئی غلطیوں کو دور کرنے کی کوشش کی جائے گی۔ بیٹنگ کوچ گرانٹ فلاور اوپنر احمد شہزاد اور نوجوان بیٹسمین حارث سہیل اور صہیب مقصود کو خاص طور پر بیٹنگ پریکٹس کرائی جائے گی۔ میچ میں ناصر جمشید کی جگہ وکٹ کیپر سرفراز احمد کی شمولیت کا بھی امکان ہے۔ جو احمد شہزاد کے ساتھ اوپن کریں گے۔ سرفراز احمد کو نئی بال کا سامنا کرنے کی مشق بھی کرائی جائے گی۔