لاہور(نیوز ڈیسک)پاکستان کی قومی کرکٹ ٹیم کے چیف سلیکٹر معین خان کی پاکستان کرکٹ بورڈ (پی سی بی) کے چیئر مین شہریار خان سے آج ہونے والی ملاقات ملتوی ہوگئی ہے۔پی سی بی ترجمان کے مطابق معین خان کی چیئر مین شہریار خان کے ساتھ ہونے والی ملاقات معین خان کی نجی مصروفیات کی بنا پر ملتوی کی گئی، جو اب کل بروز منگل متوقع ہے۔واضح رہے کہ آج ہونے والی ملاقات میں معین خان کو کسینو جانے کے معاملے پر پی سی بی کے سامنے اپنا موقف پیش کرنا تھا۔یاد رہے کہ شہریار خان نے کسینو تنازع سامنے آنے کے فوراً بعد ٹیم مینیجر نوید اکرم چیمہ کو تحقیقات کرنے کا حکم دیا تھا، تاہم پھر پی سی بی چیئرمین نے معین خان کو واپس طلب کرنے کا فیصلہ کر لیا۔اطلاعات کے مطابق معین خان کو اچانک واپس طلب کرنے کی وجہ سے ٹیم مینیجرنوید چیمہ ابھی تک رپورٹ مرتب نہیں سکے کیونکہ تاحال پی سی بی کے صدر دفتر میں واقعے سے متعلق کوئی رپورٹ نہیں پہنچی۔قومی ٹیم کی خراب کارکردگی پر رنجیدہ شائقین نے چیف سلیکٹر کے ویسٹ انڈیز کے خلاف میچ سے قبل جوا خانے میں دیکھے جانے کی رپورٹس پر شدید برہمی کا اظہار کرتے ہوئے گزشتہ ہفتے معین خان کے وطن واپس پہنچنے پر ان کے خلاف شدید احتجاج کیا تھا۔کرکٹ شائقین کی جانب سے گھر کے باہر احتجاج اور میڈیا سے بچنے کے لیے معین خان نے ایئر پورٹ سے گھر جانے والا راستہ بھی تبدیل کرلیا تھا۔دوسری جانب پی سی بی چیئرمین شہریار خان نے ایک بیان میں کہا تھا کہ معین خان کےخلاف مزید کارروائی نہیں ہوگی اور بطور چیف سلیکٹر ورلڈ کپ معین کا آخری اسائنمنٹ تھا۔