کراچی  پاکستان کرکٹ ٹیم کے سابق کپتان اور موجودہ چیف سیلیکٹر معین خان کے مطابق حالیہ کارکردگی کی وجہ سے ہندوستانی ٹیم کو پاکستان کے خلاف حاصل سبقت کم ہوگئی ہے اور گرین شرٹس اس مرتبہ ہندوستان کو ہرانے میں کامیاب رہیں گے۔ پاکستان اور ہندوستان پانچ مرتبہ ورلڈ کپ مقابلوں میں آمنے سامنے آچکے ہیں تاہم ہر مرتبہ جیت ہندوستان ہی کو نصیب ہوئی ہے۔ تاہم معین کا کہنا ہے کہ ورلڈ کپ میں انڈیا سے بدلہ لینے کا یہ بہترین موقع ہے کیوں کہ ہندوستانی ٹیم ویسی نہیں رہی جیسی ہوا کرتی تھی اور ہم انہیں ہرانے کی پوری کوشش کریں گے۔ معین جو ہندوستان کے خلاف ورلڈ کپ میں دو مرتبہ پاکستان کی نمائندگی کرچکے ہیں، نے کہا کہ انڈین ٹیم کی آسٹریلیا میں حالیہ ناقص کارکردگی نےپاکستان ٹیم کے میچ جیتنے کے امکانات بڑھا دیے ہیں۔ انہوں نے کہا کہ جب یہ دو ٹیمیں میدان میں آمنے سامنے اترتی ہیں تو پھر پچھلی کوئی کارکردگی حیثیت نہیں رکھتی۔ انہوں نے کہا کہ پاکستانی ٹیم آف اسپنر سعید اجمل کو مس کرے گی کیوں کہ وہ گزشتہ کافی عرصے سے پاکستان کے لیے بہترین باؤلنگ کررہے تھے۔ تاہم انہوں نے سعید اجمل کے ورلڈ کپ نہ کھیلنے کے فیصلے کو سراہتے ہوئے کہا کہ ورلڈ کپ کے بعد بہت کرکٹ ہونی ہے اور سعید اس کے لیے تیار رہیں۔ انہوں نے کہا کہ ابھی یہ دیکھنا باقی ہے کہ سعید نئے ایکشن کے ساتھ کس طرح باؤلنگ کررہے ہیں۔ پاکستان اور ہندوستان کے خلاف میچ اتوار کو ایڈیلیڈ میں کھیلا جائے گا۔