لندن(این این آئی)برطانیہ میں تعلیم کیلئے مقیم بھارتی خاتون کو قتل کردیا گیا، پولیس نے واقعے میں ملوث دو ملزمان کو گرفتار کرلیا۔

بھارتی میڈیا کی رپورٹ کے مطابق کونتھام تیجسوانی نامی 27 سالہ خاتون لندن میں اپنے کمرے میں مردہ حالت میں پائی گئیں۔ بتایا جارہا ہے کہ کونتھام تیجسوانی کا تعلق بھارتی ریاست تلنگانہ کے تاریخی شہر حیدرآباد سے تھا۔ بھارتی میڈیا سے گفتگو میں تیجسوانی کے والدین کا کہنا تھا کہ ان کی بیٹی اعلی تعلیم کیلئے تین سال قبل لندن گئی تھی۔ گزشتہ برس اگست میں ایک ماہ کیلئے بھارت آئی تھی، جبکہ اسے گزشتہ ماہ اپنی شادی کیلیے واپس آنا تھا۔ انہوں نے بتایا کہ انہیں بیٹی نے کہا تھا کہ جیسے ہی ان کی شراکت داری ختم ہوگی وہ واپس آجائیں گی جبکہ اس نے اپنی عارضی ملازمت سے بھی استعفی دے دیا تھا۔ دوسری جانب لندن میٹروپولیٹن پولیس کا کہنا تھا کہ انہوں نے دو افراد کو گرفتار کرلیا ہے جن میں ایک 23 سالہ برازیلین شہری کیوین ڈی مورائس اور ایک اور 23 سالہ شخص جس کی شناخت اب تک نہیں ہوسکی۔ تیجسوانی کے کزن نے بھارتی میڈیا سے بات جیت میں بتایا کہ ڈی مورائس نامی نوجوان کچھ روز قبل ہی تیجسوانی کے ہمراہ رہنے کیلئے اس کے ہاسٹل میں شفٹ ہوا تھا۔ میٹروپولیٹن پولیس کی خصوصی کرائم برانچ کی ڈیٹیکٹیو چیف انسپکٹر لنزا بارڈلے نے اپنی اپیل پر ملزم کو پکڑوانے میں تعاون پر شہریوں کا شکریہ ادا کیا۔