واشنگٹن (این این آئی)امریکی انتظامیہ اپنی کمپنی جنرل الیکٹرک کو بھارت میں جہازوں کے انجن بنانے کی اجازت دے گی، یہ انجن بھارتی فضائیہ کے طیاروں میں استعمال ہوں گے۔غیر ملکی خبر ایجنسی کے مطابق بھارتی وزیراعظم نریندر مودی 22 جون کو سرکاری دورے پر امریکا پہنچیں گے۔
دورے میں مشترکہ طور پر انجن کی تیاری سے متعلق ڈیل کا اعلان کر دیا جائے گا۔وائٹ ہائوس کو جنوری میں جہازوں کے انجن کی مشترکہ پیداوار کی درخواست موصول ہوئی تھی۔بھارت اسلحہ درآمد کرنے والا دنیا کا سب سے بڑا ملک ہے جس کا اپنی ضرورت کے نصف فوجی ساز و سامان کیلئے روس پر انحصار ہے۔
بھارت کی سرکاری ملکیتی کمپنی ہندوستان ایروناٹکس نے بتایا تھا کہ وہ امریکی جنرل الیکٹرک کے تیار کردہ انجن کو سیکنڈ جنریشن لڑاکا طیاروں میں استعمال کرنا چاہتی ہے اور ان انجنوں کی مقامی پیداوار کیلئے بات چیت کر رہی ہے۔ابھی ڈیل حتمی نہیں ہوئی ہے کیونکہ امریکی کانگریس سے اس کی توثیق ہونا باقی ہے۔واشنگٹن نے اپنی مقامی ملٹری ٹیکنالوجی دیگر ممالک کو فروخت کرنے کے حوالے سے سختیاں عائد کی ہوئی ہیں۔بھارت اپنی فضائیہ اور بحریہ کیلئے اگلی دو دہائیوں میں 350 لڑاکا طیارے بنانا چاہتا ہے جس میں وہ مقامی طور پر تیار کردہ انجن نصب کرے گا۔
