لاہور(این این آئی) مشیر کھیل پنجاب وہاب ریاض نے کہا ہے کہ ایسا نہیں ہو سکتا کہ آپ ورلڈکپ سے دستبردار ہوں ورلڈکپ میں ضرور شرکت کرنی چاہیے۔پریس کانفرنس کرتے ہوئے وہاب ریاض نے کہا کہ بھارت کے ساتھ سیاسی معاملات چلتے رہے ہیں ، بھارت کو یہاں آکر کھیلنا چاہیے سب بڑی ٹیمیں پاکستان آچکی ہیں، ایسا نہیں ہو سکتا کہ پاکستان بھی ورلڈکپ سے دستبردار ہو ، ورلڈکپ میں ضرور شرکت کرنی چاہیے۔

مشیر کھیل پنجاب نے ایشیا کپ تناز ع پر بات کرتے ہوئے کہا کہ پاکستان نے جو فارمولا دیا ہے وہ اچھا ہے کم از کم پاکستان میں میچز ہونے چاہئیں۔وہاب ریاض نے بتایا کہ ہم 300 ایتھلیٹس کے لیے ایک پلیٹ فارم بنا رہے ہیں جس میں انہیں ہر طرح کی سہولیات ملیں گی،پاکستان کرکٹ بورڈ نے کرکٹ کے لیے اچھا کام کیا ہے ، بجٹ میں اچھی رقم ایتھلیٹس کیلئے مختص کی جا رہی ہے ، رمضان میں خاص طور مختلف گیمز کرائی گئیں، ہاکی کی بحالی پر خاص توجہ دی گئی۔وہاب ریاض کے مطابق وزیر اعلی پنجاب نے ہاکی کے20 بہترین کھلاڑیوں کو ماہانہ اعزازیہ دینے کا اعلان کیا تھاجن کے پاس جاب نہیں ہے ان 20 کھلاڑی ماہانہ معاوضہ دیا جائیگا، کھلاڑیوں میں نیشنل اور انٹرنیشنل کھلاڑی شامل ہیں، آغاز میں کھلاڑیوں کو آئندہ ماہ سے20 ہزار روپے ماہانہ ملے گا، چھوٹے شہروں کے کھلاڑیوں کو ٹریننگ کے اخراجات ادا کریں گے،کھلاڑیوں کا میڈیکل فری کرنے کے لیے اقدامات کیے جارہے ہیں ابھی ہم نے آغاز کیا ہے جبکہ ماہانہ اعزازیہ میں مستقبل میں اضافہ کیا جائے گا۔وہاب ریاض نے کہا کہ میں اب بھی کرکٹ پر توجہ دے رہا ہوں ، ابھی میں سری لنکا لیگ میں بھی حصہ لوں گا۔