اسلام آباد (مانیٹرنگ ڈیسک /این این آئی)اسلام آباد میں نافذ دفعہ 144کو خاطر میں نہ لاتے ہوئےانصار الاسلام کے رضا کاراور پی ڈیم کے کارکنان گیٹ پھلانگ کر ریڈ زون میں داخل ہو گئے ۔ نجی ٹی وی کے مطابق پی ڈی ایم کے کارکنان ٹرک اور گاڑیاں لے کر ریڈزون میں داخل ہو گئے ہیں۔

قبل ازیں پی ڈی ایم و جے یو آئی کے سربراہ مولانا فضل الرحمٰن کی کال پر سپریم کورٹ آف پاکستان کے سامنے احتجاج و دھرنے کے لیے اسلام آباد پہنچنے والے پی ڈی ایم کے کارکنان نے ریڈزون میں داخلے کی کوشش کی، تاہم نادرا چوک پر پہنچنے والے کارکنان کو پولیس نے واپس بھیج دیا۔اسلام آباد پولیس کی جانب سے کارکنان کو مارگلہ روڈ یا ایوب چوک سے ریڈزون میں داخلے کی ہدایت کی گئی۔اسلام آباد کی انتظامیہ کی جانب سے ڈی چوک مکمل طور پر بند کر دیا گیا ہے، سپریم کورٹ کے باہر ایف سی اور پولیس کی بھاری نفری تعینات ہے۔دوسری جانب وفاقی وزیر خزانہ اسحاق ڈار اور وزیر داخلہ رانا ثناء اللہ نے پاکستان ڈیموکریٹک موومنٹ (پی ڈی ایم)کے سربراہ مولانا فضل الرحمان سے ملاقات کی جس میں وفاقی وزراء نے مولانا فضل الرحمان سے سپریم کورٹ کے باہر احتجاج نہ کرنے کی اپیل کی۔اس حوالے سے اسحاق ڈار نے کہاکہ کچھ روز قبل بھی ملک میں حالات خراب ہوئے لہٰذا وفاقی حکومت چاہتی ہے پی ڈی ایم ڈی چوک پر احتجاج کرے۔وفاقی وزراء کی اپیل پر مولانا فضل الرحمان نے کہاکہ ہم اعلان کرچکے ہیں فیصلہ اب عوام کی عدالت میں ہوگا،ملک بھرسے قافلے اسلام آباد کی جانب روانہ ہوچکے۔انہوں نے کہاکہ کارکن پر امن ہیں اور پر امن احتجاج ہوگا، ہمارے کارکن ایک گملہ یا پودا بھی نہیں توڑیں گے۔