سرینگر(این این آئی)غیر قانونی طور پر بھارت کے زیر قبضہ جموں و کشمیر میں پاکستان کے آرمی چیف جنرل سید عاصم منیر کی تصاویر والے پوسٹرچسپاں کئے گئے ہیں، جن میں کشمیریوں کے ساتھ اظہار یکجہتی کرنے پر ان کی تعریف کی گئی ہے۔
کشمیر میڈیا سروس کے مطابق سرینگر میں متعددمقامات پرچسپاں کئے گئے پوسٹروں میں لکھا گیا ہے کہ شکریہ پاکستان، پاکستانی آرمی چیف، ہم مقبوضہ ریاست جموں و کشمیر کے بارے میں اپنے قومی موقف پر قائم رہنے اور کشمیریوں کی منصفانہ جدوجہد آزادی کی حمایت کرنے پر آپ کے شکر گزار ہیں۔جموں و کشمیر پولیٹیکل ریزسٹنس موومنٹ، جموں و کشمیر ڈیموکریٹک موومنٹ ، وارثین شہداء اور دیگر تنظیموں کی طرف سے سرینگر اوردیگر علاقوں میں دیواروں، ستونوں اور کھمبوں پر پوسٹرچسپاں کئے گئے ہیں۔یہ پوسٹر فیس بک اور ٹوئٹر سمیت سوشل میڈیا پر بھی جاری کئے گئے ہیں ۔
