کراچی (این این آئی)سابق وزیراعظم وپیپلزپارٹی کے بانی ذوالفقار علی بھٹو کی پوتی اور میر مرتضیٰ بھٹو کی بیٹی فاطمہ بھٹو نے سندھ حکومت پر سخت تنقید کرتے ہوئے کہاہے کہ میں نے فروری میں سجاول کے گھوسٹ اسکول کی پوسٹ کی تھی

یہ گھوسٹ اسکول سندھ حکومت کی بدعنوانی کی بدولت خالی تھا۔ٹوئٹر پر جاری بیان میں فاطمہ بھٹو نے کہا کہ میں نے فروری میں سجاول کے گھوسٹ اسکول کی پوسٹ کی تھی،یہ گھوسٹ اسکول سندھ حکومت کی بدعنوانی کی بدولت خالی تھا۔انہوں نے لکھا کہ اسکول میں جھاڑیاں اْگ رہی تھیں اور اب بھی یہی حال ہے، ایک اہلکار میری پوسٹ کیبعد ملنے آیا تھا تاہم اسکول کا وہی حال ہے، میرے لکھنے کے بعد کچھ بھی نہیں کیا گیا۔فاطمہ نے سوال کیا کون سے اساتذہ یہاں کام کرنے کے طور پر رجسٹرڈ ہیں؟ وہ اساتذہ سرکاری تنخواہ لے رہے ہیں، ہمیں ان کے نام معلوم ہونے چاہئیں، بدعنوانی جاری ہے، 10سال پہلے تعمیرہوا سجاول تعلقہ ہسپتال بھی چھوڑدیا گیا۔انہوں نے کہاکہ خواتین کو بنیادی طبی امداد کے لیے لاڑکانہ جانا پڑتا ہے، اس سفر کے دوران اکثر خواتین کی موت بھی واقع ہو جاتی ہے، یہ عملاً بدعنوانی ہے، نہ اسکول، نہ ہسپتال۔فاطمہ بھٹو نے کہا آپ جانتے ہیں کہ پیسہ کہاں جا رہا ہے، پورا ملک جانتا ہے، نسلیں اس کی قیمت ادا کریں گی۔