لزبن (این این آئی)پرتگال میں کبوتر بازی میں سبقت لے جانے کی دوڑ تباہی میں بدل گئی۔ کبوتروں کے شوقین ایک شخص نے مقابلہ کے تین حریفوں کو قتل کرکے خودکشی کرلی۔میڈیارپورٹس کے مطابق پرتگالی پولیس نے بتایا کہ ایک شخص نے خود کو گولی مارنے سے پہلے تین افراد کو گولی مار دی تھی۔
مقامی میڈیا نے بتایا کہ کبوتروں کی دوڑ میں حریفوں کے درمیان جھگڑا ہوگیا تھا۔ لزبن کے جنوب میں واقع شہر سیٹوبل کے پولیس کمشنر اینڈریا گونسالویس کے مطابق 30 سے 60 سال کی عمر کے چار افراد کے درمیان جھگڑا ہوا ۔ ان میں سے ایک نے خود کو گولی مارنے سے پہلے باقی تین کو مار ڈالا۔پرتگالی میڈیا نے جائے وقوعہ سے اطلاع دی کہ چاروں مرنے والے کبوتر کی دوڑ میں حصہ لے رہے تھے اور ان کا جھگڑا بھی سبزیوں کے ایک غیر قانونی باغ پر مرکوز تھا۔ پرتگال میں آتشیں اسلحے کے استعمال پر پابندی ہے تاہم اسلحہ کے ذریعہ شکار کی اجازت دی جاتی ہے۔ پولیس کے اعدادوشمار کے مطابق پرتگال میں 2015 سے اب تک ہر سال ہونے والے 80 قتلوں میں سے اوسطا پانچ اسلحے کے ذریعے کیے گئے ہیں۔
