اسلام آباد (این این آئی)پاکستان کرکٹ بورڈ (پی سی بی) منیجمنٹ کمیٹی کے سربراہ نجم سیٹھی نے کہا ہے کہ بھارت ایشیا کپ نہ بھی کھیلے تو پاکستان کو کوئی فرق نہیں پڑے گا۔میڈیا سے گفتگو کرتے ہوئے انہوں نے کہاکہ پی ایس ایل سے پی سی بی کو مالی استحکام ملا ہے لہٰذا بھارت کے ایشیا کپ نہ کھیلنے سے بھی انہیں مالی طور پر کوئی خاص فرق نہیں پڑے گا۔نجم سیٹھی نے کہا کہ ماضی میں بھارت کے انکار کے باوجود ہم بھارت جاکر کھیلتے رہے ہیں تاہم اب صورتحال مختلف ہے لوگ پوچھتے ہیں بھارت کھیلنے نہیں آتا تو پاکستان ٹیم کیوں جاتی ہے؟ بھارت کا پاکستان آنا سیاسی مسئلہ ہے تو پاکستان کا بھی ہے۔انہوں نے کہا کہ بھارت اگر ایشیا کپ کے میچز نیوٹرل مقام پر کھیلنا چاہتا ہے تو پھر پاکستان بھی بھارت میں ہونے والے ورلڈ کپ کے میچز نیوٹرل مقام پر کھیل سکتا ہے۔