اسلام آباد (مانیٹرنگ  ڈیسک ) امریکی انسانی حقوق کی ایڈووکیٹ ” کیرین جودھا فشر“ نے واشنگٹن میں” ڈان نیوز” کے بیورو چیف کے ساتھ پاکستان میں انتخابات سے متعلق مبینہ منصوبہ بندی کے بارے میں ہونے والی گفتگو سوشل میڈیا پر شیئر کر کے تہلکہ برپا کر دیا ، جس کی تصدیق” ڈان نیوز” کے

بیورو چیف نے میدان میں اترتے ہوئے خود ہی کر دی ہے ۔تفصیلات کے مطابق کیرین فشر نے ٹویٹر پر پیغام جاری کرتے ہوئے کہا کہ ”واشنگٹن ڈی سی میں” ڈان “کے بیورو چیف نے مجھے بڑے فخر سے بتایا کہ جلد ہی نیا چیف جسٹس آئے گا جو ستمبر میں انتخابات کم از کم 2سال مؤخر کرنے کی اجازت دے گا، میرے خیال میں یہی منصوبہ ہے ، شرمناک !“کیرین فشر کا پیغام دیکھ کر”ڈان نیوز” کے بیورو چیف انور اقبال نے جواب دیتے ہوئے کہا کہ ”یہ ایک نجی گفتگو تھی جسے آپ نے مجھ سے پوچھے بغیر ہی یہاں پر پوسٹ کر دیاہے اور جو آپ کو بہتر لگا آپ نے اسے نمایاں کر دیا ۔“فشر نے جواب دیتے ہوئے کہا کہ ”میں نے آپ کا نام کہیں بھی استعمال نہیں کیا ، آپ نے خود کیا ، جیسا آپ نے مجھے پیغام بھیجا میں نے ویسا ہی شیئر کر دیا، صحافیوں کے ساتھ ہونے والی تمام گفتگو کبھی نجی نہیں ہوتی ، کیابھی آپ نے کبھی مجھ سے میرا احوال جاننے کیلئے پیغام بھیجا ہے ؟ یہ ہمیشہ معلومات کی تلاش ہے ، جس پر مجھے کوئی اعتراض نہیں “۔