لاہو ر( این این آئی) پاکستان ویمن کرکٹ ٹیم کی قیادت کے فرائض سرانجام دینے والی بسمعہ معروف نے کپتانی سے استعفیٰ دے دیا البتہ وہ بطور کھلاڑی ٹیم کے لئے دستیاب ہوں گی۔سماجی رابطے کی ویب سائٹ ٹوئٹر پر پاکستان کرکٹ بورڈ کی مینجمنٹ کمیٹی کے سربراہ نجم سیٹھی نے لکھا کہ انہوں نے بسمہ معروف کا استعفیٰ قبول کیا ہے۔انہوں نے مزید کہا کہ بسمہ معروف نوجوان کھلاڑیوں کو موقع دینا چاہتی ہیں۔خوشی کی بات ہے کہ وہ پاکستان کے لیے کھیلتی رہیں گی اور اپنے ملک کا نام روشن کریں گی۔بسمہ کی قیادت میں قومی ویمن ٹیم کی پرفارمنس کا گراف ملاجلا رہا، کمزور ٹیموں کے خلاف ٹیم کی مجموعی پرفارمنس اچھی رہی جبکہ مضبوط ٹیموں کے خلاف کارکردگی غیر معیاری رہی۔اعداد شمار کے مطابق بسمہ معروف کی کپتانی میں 62میں سے 27ٹی ٹونٹی میچز میں کامیابی پائی جبکہ 32میچز میں شکست کا سامنا کرنا پڑا۔ اسی طرح 34میں سے 16ون ڈے میچز میں بطور کپتان بسمعہ سرخرو رہیں۔