اسلام آباد (این این آئی)وزیر اعظم شہباز شریف نے کہا ہے کہ صدر عارف علوی کو الیکشن کمیشن کا خط غیر آئینی ہے، صدر غیر آئینی کاموں سے باز رہیں۔وزیرِ اعظم شہباز شریف کی زیرِ صدارت سیاسی صورتِ حال پر اجلاس ہوا جس میں سینئر پارٹی رہنما، اتحادی جماعتوں کے رہنما اور حکومتی قانونی ٹیم

بھی شریک ہوئی۔اجلاس کے دوران وزیرِ اعظم شہباز شریف نے رہنمائوں کو صدر کو خط لکھنے پر اعتماد میں لیا۔اجلاس میں سپریم کورٹ کے ازخود نوٹس پر قانونی ٹیم نے بریفنگ دی۔نجی ٹی وی کے مطابق اجلاس میں مطالبہ کیا گیا کہ جسٹس اعجازالاحسن اور جسٹس مظاہر نقوی خود کو ن لیگ سے متعلق کیسز سے الگ کر لیں۔وزیرِ اعظم شہباز شریف نے اجلاس سے خطاب میں کہا کہ پاکستان تحریکِ انصاف کی برائے نام جیل بھرو تحریک ناکام ہو چکی ہے۔انہوں نے کہا کہ عوام نے انتشار کی سیاست کو رد کر دیا ہے، عوام تحریکِ انصاف کے یوٹرنز کو جان چکے ہیں، حکومت عدالتوں کا احترام کرتی ہے۔وزیرِ اعظم شہباز شریف نے کہا کہ الیکشن کمیشن خود مختار ادارہ ہے، الیکشن کمیشن کا جو بھی فیصلہ ہو گا حکومت اس پر عمل کرے گی۔ شہباز شریف نے کہا ہے کہ صدر عارف علوی کو الیکشن کمیشن کا خط غیر آئینی ہے، صدر غیر آئینی کاموں سے باز رہیں۔