ملتان(این این آئی)ملتان میں پی ایس ایل کی افتتاحی تقریب اور پہلے میچ کے موقع پر تاخیر سے آنے والے شائقین کیلئے پولیس نے مرکزی گیٹ نہ کھولا، شائقین کی طرف سے اصرار پر پولیس نے لاٹھی چارج کر دیا، درجنوں شائقین زخمی ہو گئے۔کرکٹ شائقین کے مطابق ذرا سی تاخیر پر سینکڑوں لوگوں کو اندر نہ جانے دیا گیا حالانکہ ان کے پاس ٹکٹس بھی تھیں، شائقین کی طرف سے اصرار پر پولیس اہلکاروں اور شائقین کے درمیان تلخی ہو گئی جس پر پولیس اہلکاروں نے شائقین ہر لاٹھی چارج شروع کر دیا، لاٹھی چارج سے بچنے کیلئے شائقین پیچھے ہٹے تو سیکورٹی کے لیے لگائی ریزر وائر میں جا گرے ، جس سے درجنوں افراد زخمی ہو گئے اور چند افراد لوگوں کے نیچے آ کر فریکچر کا بھی شکار ہوئے۔اطلاع پر ریسکیو ٹیموں نے زخمیوں کو طبی امداد دی۔