ریوڈی جنیرو(این این آئی)برازیل کے صدر لولا ڈی سلوا نے کہاہے کہ مجھے فوج سے کوئی مسئلہ نہیں ہے، نا ہی انہیں مجھ سے مسئلہ ہے لیکن جنہیں سیاست میں ملوث ہونے میں دلچسپی ہے وہ وردی اتاریں، مستعفی ہوں اور پھر سیاست میں آئیں۔غیرملکی خبررساں ادارے کے مطابق برازیلی صدر نے 8جنوری کو دارالحکومت میں ہونے والے فسادات کو انٹیلی جنس ایجنسیوں کی ناکامی قرار دیتے ہوئے کہاکہ برازیلیا کی عمارتوں پر سابق صدر بولسونارو کے حامیوں نے حملہ کیا، یہ انٹیلی جنس کی ناکامی تھی۔انہوں نے کہا کہ ہم نے بنیادی غلطی کی، اس دن میری کوئی انٹیلی جنس معلومات نہیں تھیں۔صدر نے کہا کہ ہمارے پاس آرمی انٹیلی جنس، ایئرفورس انٹیلی جنس، اے بی آئی این (خفیہ انٹیلیجنس ایجنسی) موجود ہے لیکن ان میں سے کسی نے مجھے اطلاع نہیں دی۔