لاہور ( این این آئی) پاکستان مسلم لیگ (ن) کی سینئر نائب صدر و چیف آرگنائزر مریم نواز کی وطن واپسی کا شیڈول تبدیل ہو گیا ۔
اب 29جنوری کو پاکستان واپسی کا امکان ہے ۔ذرائع کے مطابق مسلم لیگ (ن) کی چیف آرگنائزر مریم نواز نے تبدیل ہوتے سیاسی حالات میں فوری وطن واپس آنے کا فیصلہ کیاہے ۔مریم نواز 29جنوری کو لندن سے لاہور ایئرپورٹ پہنچیں گی۔مسلم لیگ (ن) کی سینئر نائب صدر مریم نواز وطن واپسی کے بعد پنجاب کے مختلف اضلاع کے دورے کریں گی اور پارٹی رہنمائوں سے اہم ملاقاتیں بھی کریں گی۔ مریم نواز الیکشن مہم اور نچلی سطح تک پارٹی کو متحرک کرنے کے لیے ذمہ داران کو ٹاسک تفویض کریں گی۔دوسری جانب کیپٹن (ر) صفدر نے میڈیا سے گفتگو میں بتایا کہ ان شااللہ مریم نواز کا شاندار استقبال کیا جائے گا۔انہوں نے بتایا کہ مریم نواز اور نواز شریف کے استقبال کی ریہرسل ہوگی۔واضح رہے کہ وزیرداخلہ راناثنا اللہ بھی بدھ کے روز نجی پرواز کے ذریعے اسلام آباد انٹرنیشنل ایئرپورٹ سے لندن روانہ ہوئے تھے جہاں وہ پارٹی قائد نواز شریف سے اہم ملاقات کریں گے ۔
