کراچی(این این آئی)دوسرے مرحلے کے بلدیاتی انتخابات میں کراچی کے مختلف اضلاع کے بلدیاتی نتائج جاری کرنے میں تاخیر پر سیاسی جماعتوں نے ڈپٹی کمشنرز پر نتائج بدلنے کا الزام عائد کردیاہے ۔ جماعت اسلامی، تحریک انصاف اور تحریک لبیک نے کہا کہ ڈپٹی کمشنر پیپلزپارٹی کی ایما پر نتائج بدلنے کے حربے اختیار کررہے ہیں ۔

تحریک انصاف نے الزام عائد کیا کہ ڈی سی کیماڑی قادر پٹیل کی ایما پر پاکستان تحریک انصاف کی یوسی 8 میں فتح کے نتائج کو ہار میں تبدیل کرنے میں مصروف ہے۔پی ٹی آئی کی پولنگ ٹیم کے مطابق 600 ووٹ کی برتری کو کو ہار میں تبدیل کیا جا رہا ہے الیکشن کمیشن کا عملہ خاموش تماشائی بنا ہوا ہے اور تین مرتبہ ووٹ کی گنتی کے باوجود فارم 11 پر نتیجہ نہیں دیا جارہا۔سبحان علی ساحل نے کہاکہ پیپلز پارٹی اپنے غیر آئینی اور غیر جمہوری رویوں سے پہلے ہی شہر قائد کو بہت نقصان پہنچا چکی ہے۔ اس طرح نتائج کی ردوبدل کے خلاف ہم پرزور احتجاج کرتے ہیں۔الیکشن کمیشن پیپلز پارٹی کی چاکری کے بجائے اپنے آئینی وقانونی فرائض دیانتداری سے سرانجام دے۔جماعت اسلامی نے بھی ڈپٹی کمشنرز پر نتائج کی تبدیلی کا الزام عائد کیا ہے ۔ ادھرٹی ایل پی کا کہنا ہے کہ الیکشن کمیشن فری اینڈ فئیر الیکشن کرانے میں ناکام ہو گیا صوفی یحییٰ قادری نے کہاکہ غیر تربیت یافتہ عملہ ادھورے سامان کے ساتھ تعینات کیا گیا۔ صوفی یحییٰ قادری نے کہاکہ کائونٹنگ کے وقت ہمارے پولنگ ایجنٹس کو فارم 11 دینے سے انکار کردیا گیا۔ انہوں نے کہا کہ پیپلز پارٹی نے آخری دن تک الیکشن کو مذاق بنائے رکھا اور الیکشن کے انعقاد کو مختلف ٹیکنیکی معاملات میں الجھا کر عوام کے لیئے غیر یقینی صورتحال پیدا کیئے رکھی جبکہ سیکیورٹی ٹھریٹس دیکھا کر عوام جو ہراساں کر دیا گیا تاکہ عوام نہ نکلے۔