پرویزالٰہی کی زیر صدارت مشاورتی اجلاس ،نگران وزیراعلیٰ کے نام کے حوالے سے غور
لاہور ( این این آئی)وزیراعلیٰ پنجاب چودھری پرویزالٰہی کی زیر صدارت وزیراعلیٰ آفس میں اعلیٰ سطح کا مشاورتی اجلاس منعقد ہوا جس میں اسمبلی تحلیل کی ایڈوائس کے بعد قانونی و آئینی پہلوؤں کا جائزہ لیا گیا ۔ اجلاس میں نگران وزیراعلیٰ کے
نام کے حوالے سے بھی غور کیا گیا۔ وزیراعلیٰ چودھری پرویز الٰہی نے کہا کہ عمران خان سے جو وعدہ کیا اسے نبھایا اور ہم جس کے ساتھ چلتے ہیں، خلوص اور دل سے ساتھ دیتے ہیں۔عمران خان کی آواز پر لبیک کہا ہے اور آئندہ بھی عمران خان کا ساتھ دیں گے۔ وزیراعلیٰ چودھری پرویزالٰہی نے کہا کہ قانون اور آئین کے تحت کام کیا ہے۔ اسمبلی کی تحلیل کے بعد آئین کے تحت نگران سیٹ اپ مشاورت سے تشکیل پائے گا۔ سپیکر پنجاب اسمبلی محمد سبطین خان،صوبائی وزراء میاں محمودالرشید،سردار حسنین بہادر دریشک،صوبائی مشیر عامر سعید راں، ایم پی اے یوسف بادوزئی،اکبر خان اور سیکرٹری پنجاب اسمبلی عنایت اللہ لک نے مشاورتی اجلاس میں شرکت کی۔
