اسلام آباد(این این آئی)متحدہ قومی موومنٹ کے حکومت چھوڑنے کے خدشات کے بعد آصف علی زرداری اور مولانا فضل الرحمان نے الگ الگ خالد مقبول صدیقی سے رابطہ کیا ہے۔ذرائع کے مطابق ٹیلی فونک رابطے میں دونوں رہنمائوں نے مختلف معاملات پر گفتگو کی، سابق صدر آصف علی زرداری
کی جانب سے خالد مقبول صدیقی کو یقین دہانیاں کرائی گئیں۔ذرائع نے بتایاکہ سابق صدر آصف علی زرداری نے مل بیٹھ کر تمام مسائل حل کرنے کی پیشکش کی ہے۔اس کے علاوہ پی ڈی ایم کے سربراہ مولانا فضل الرحمان نے بھی خالد مقبول صدیقی سے ٹیلیفونک رابطہ کرتے ہوئے بلدیاتی انتخابات سے متعلق گفتگو کی۔ذرائع کے مطابق مولانا فضل الرحمان نے خالد مقبول صدیقی کو صبر سے کام لینے کا مشورہ دیا ہے۔واضح رہے کہ ایم کیو ایم پاکستان کی رابطہ کمیٹی نے اپنے ارکان قومی اسمبلی سے استعفے طلب کرلیے ہیں۔بہادرآباد میں ہونے والے رابطہ کمیٹی کے اجلاس میں ایم کیو ایم نے وفاقی کابینہ اور حکومت سے علیحدگی اور دیگر آپشنز پر غور کیا گیا۔ایم کیو ایم رہنما خواجہ اظہار الحسن نے کہاکہ رابطہ کمیٹی کے بعض ارکان کی رائے ہے15جنوری کو بلدیاتی الیکشن ہو تو حکومت سے علیحدہ ہوجائیں، حتمی فیصلہ (آج)ہفتہ کو ایم کیوایم کے جنرل ورکرز اجلاس میں ہوگا۔
