اسلام آباد (مانیٹرنگ ڈیسک/این این آئی ) قومی ٹیم کی جانب سے فخر زمان اور شان مسعود نے اننگز کا آغاز کیا لیکن شان مسعود دوسری ہی گیند پر بغیر کوئی رن بنائے وکٹوں کے پیچھے کیچ آؤٹ ہو گئے جبکہ 21 کے مجموعی اسکور پر پاکستان کے

کپتان بابر اعظم 13 گیندوں پر صرف 4 رنز بنا کر بریسویل کی گیند پر اسٹمپ آؤٹ ہو گئے۔ دو وکٹیں جلد گرنے کے بعد فخر زمان اور محمد رضوان نے ذمہ دارانہ بیٹنگ کا مظاہرہ کرتے ہوئے اپنی ٹیم کا اسکور آگے بڑھایا اور اسی دوران فخر زمان نے ایک روزہ میچوں میں اپنی 16 ویں نصف سنچری اسکور کی۔ دوسری جانب پاکستان کرکٹ ٹیم کے بیٹر فخرزمان نے ایک روزہ بین الاقوامی میچوں میں اپنی آٹھویں سنچری جڑ دی۔ نیشنل اسٹیڈیم کراچی میں کھیلی جارہی تین ایک روزہ بین الاقوامی میچوں کی سیریز کے تیسرے اور آخری میچ میں جمعہ کو فخرزمان نے 157 منٹ میں 120 گیندوں پر 10چوکے اور ایک چھکا لگایا۔بائیں ہاتھ سے بیٹنگ کرنے والے 32 سالہ بیٹسمین فخرزمان 64 ایک روزہ بین الاقوامی میچ کھیل چکے ہیں اور 64اننگز کے دوران وہ 4 مرتبہ ناٹ آئوٹ رہے،انہوں نے مجموعی طور پر 2684 رنز میں 8 سنچریاں اور 15نصف سنچریاں بنائی ہیں۔