لاہور( این این آئی)مسلم لیگ (ق) کے سربراہ چوہدری شجاعت حسین سے جمعیت علمائے اسلام (ف ) کے سیکرٹری جنرل مولانا عبدالغفور حیدری نے ان کی رہائشگاہ پر ملاقات کی ۔ مولانا عبدالغفور حیدری نے چوہدری شجاعت حسین کی خیریت دریافت کی
اورمولانا فضل الرحمن کی طرف سے نیک خواہشات کا اظہار کیا ۔ملاقات میں ملکی سیاسی صورتحال اور پنجاب میں پیدا سیاسی بحران پر گفتگو کی گئی ۔ عبد الغفور حیدر نے کہا کہ عمران خان نے ملک میں گالی کلچر کو فروغ دیا۔ انہوںنے کہا کہ چوہدری شجاعت حسین کا سیاست میں نام رواداری اور رکھ رکھا ئوکا ہے ۔پاکستان مسلم لیگ (ق) کے سربراہ چودھری شجاعت حسین نے سینیٹر مولانا عبدالغفور حیدری سے گفتگو کرتے ہوئے کہا کہ کچھ بھی ہو پنجاب اسمبلی نہیں ٹوٹے گی، عام انتخابات دور دور تک نظر نہیں آ رہے۔انہوںنے کہا کہ آٹے کی بڑھتی قیمتوں سے عام آدمی بہت زیادہ پریشان ہے، صوبائی حکومتوں کا فرض ہے کہ روزمرہ استعمال کی اشیا ء مہنگی ہونے پر ایکشن لیں۔انہوںنے کہا کہ تمام لیڈران اپنی اپنی بولی بولنے کی بجائے اکٹھے ہو کر ملکی مسائل حل کریں تمام سیاستدان اکٹھے ہوکر صرف ایک ایجنڈے مہنگائی کو ختم کرنے پر کام کریں۔
