لاہور ( این این آئی) پاکستان کرکٹ بورڈ کی عبوری سلیکشن کمیٹی کے سربراہ شاہد آفریدی نے ٹی ٹونٹی پلیئرز کے انتخاب کے لئے سٹرائیک ریٹ کے حوالے سے دئیے گئے بیان پر وضاحت دے دی۔حال ہی میں نجی میڈیا سے گفتگو کرتے ہوئے شاہد آفریدی نے کہا تھا کہ ڈومیسٹک اور ٹی ٹونٹی کیلئے کہہ دیا ہے کہ
وہ کھلاڑی منتخب نہیں کیا جائیگا جس کا سٹرائیک ریٹ 130یا 135سے اوپر نہ ہو، ہماری جاب ہے جس کیلئے مختلف چیزیں شیئر کی جارہی ہیں اور اچھی بات یہ ہے کہ ٹیم اور سلیکشن کمیٹی کے درمیان اچھی انڈرسٹینڈنگ پیدا ہو رہی ہے۔شاہد آفریدی کے اس بیان کے بعد سوشل میڈیا پر کپتان بابر اعظم اور محمد رضوان کے سٹرائیک ریٹ کے حوالے سے سوالات اٹھنے لگے تھے، اسی دوران ایک ٹوئٹ بھی سامنے آئی جس میں درج تھا کہ ٹی ٹونٹی کرکٹ میں پاکستان ٹیم کے کپتان بابر اعظم کا سٹرائیک ریٹ 127.80 اور وکٹ کیپر محمد رضوان کا سٹرائیک ریٹ 126.62 ہے اور اب چیف سلیکٹر شاہد آفریدی کہہ رہے ہیں کہ ٹی ٹونٹی فارمیٹ میں 130سے 135سٹرائیک ریٹ سے کھیلنے والے منتخب ہو نگے۔صحافی یحیحی حسینی نے ٹوئٹر پر بتایا کہ ان کے اس ٹوئٹ کے بعد انہیں شاہد آفریدی کی جانب سے کال کر کے وضاحت دی گئی ہے کہ یہ بات انہوں نے ڈومیسٹک سے قومی ٹیم میں آنے والوں کے لیے تجویز کی ہے۔یحیحی حسینی نے لکھا کہ چیف سلیکٹر ہمارے سپر سٹار تھے اور ہیں، اس ٹوئٹ پر ان کا مجھے پیغام آیا کہ یہ بات انہوں نے ڈومیسٹک سے قومی ٹیم میں آنے والوں کے لیے تجویز کی ہے، بوم بوم کا کہنا ہے کہ ٹیسٹ کے بعد انہوں نے صرف ون ڈے سکواڈ منتخب کرنا ہے۔
