لاہور ( این این آئی) نائب امیر جماعت اسلامی لیاقت بلوچ نے کہاہے کہ عمران خان اور پرویز الٰہی کے راستے عملی طور پرجدا ہوگئے، چوہدری خاندان کے پاس جڑنے کا بہترین آپشن پھر میسرآگیا ہے ، چوہدری خاندان کے لیے اب پی ٹی آئی اور مسلم لیگ نواز ایک ہی طرح کے مخالف دھڑے بن گئے،
آئندہ انتخابات کے لیے مسلم لیگ (ق) کو نئی دنیا بنانی ہوگی ۔ منصورہ میں وفودسے ملاقات کے دوران لیاقت بلوچ نے کہا کہ جب تک سیاست اصولوں ، میرٹ ، جمہوری پارلیمانی قدوںکی پابند نہ ہو تو صرف اور صرف مفادات ہی سب کچھ بن جاتے ہیں ۔ عام انتخابات تو اب نوشتہ دیوار ہیں لیکن انتخابات کو بااعتماداور پائیدار بنانے کے لیے قومی قیادت لاحاصل جھگڑا ترک کرکے انتخابی اصلاحات ، متناسب نمائندگی کی بنیاد پر انتخابات کے لیے قومی ڈائیلاگ کرے۔لیاقت بلوچ نے قطر کے امیر اور عوام کو مبارک باد یتے ہوئے کہاکہ ورلڈکپ تو ارجنٹائن لے گیا لیکن قطر نے پوری دنیا میں حیرت انگیز خوشگوار اثرات نقش کئے ہیں ۔ قطرنے میگا ایونٹ کامیابی سے منعقد کرکے تمام مسلم ممالک کا سر فخر سے بلند کیا ہے جس سے عالم اسلام کا مثبت پیغام گیا ہے ۔ قطر کے حکمرانوں نے کمال حکمت اور شاندار تدبیر کے ساتھ مغربی کی بجائے اسلامی مشرقی کلچر کی دھاک بٹھائی ہے ۔ پاکستان کی عوام فرانس فٹبال ٹیم کے مقابلہ میں ارجنٹائن کے حامی تھے۔ ارجنٹائن نے سعودی عرب سے شکست کے بعد شاندار کم بیک کیا اور عالمی چیمپئن بن گیا ۔
