لندن (مانیٹرنگ، این این آئی) انگلینڈ ٹیسٹ ٹیم کے کپتان بین اسٹوکس کی جانب سے سیلاب زدگان کی مدد کے اعلان پر وزیراعظم شہباز شریف نے اپنے ٹوئٹ میں ردعمل دیتے ہوئے کہا کہ ہم انگلینڈ کے کپتان بین اسٹوکس کی طرف سے ٹیسٹ سیریز کی اپنی تمام میچ فیس سیلاب متاثرین کو دینے کے اس اقدام کو سراہتے ہیں،

دکھی انسانیت کے ساتھ ہمدردی سب سے افضل ہے، وزیراعظم شہباز شریف نے اپنے ٹوئٹ میں مزید کہا کہ یہ جذبہ برطانیہ کی عظیم انسان دوستی کی روایت کا مظہر ہے۔ واضح رہے کہ اس سے قبل انگلینڈ کی ٹیسٹ ٹیم کے کپتان بین اسٹوکس نے پاکستان میں سیلاب متاثرین کی مدد کے لیے بڑا اعلان کیا تھا۔پیر کو انگلش کپتان بین اسٹوکس نے سیلاب متاثرین کی مدد کیلئے ٹیسٹ میچ عطیہ کرنے کا اعلان کیا ہے۔بین اسٹوکس نے کہا کہ اس سال کے شروع میں پاکستان کو تباہ کرنے والے سیلاب کو دیکھ کر بہت دکھ ہوا اور سیلاب کے ملک اور عوام پر خاصے اثرات مرتب ہوئے۔انگلش کپتان کے مطابق کھیل نے میری زندگی میں مجھے بہت کچھ دیا ہے اور میں صرف یہی حق سمجھتا ہوں کہ کرکٹ سے بالاتر ہو کر کچھ واپس دوں، میں اس ٹیسٹ سیریز سے اپنی میچ فیس پاکستان سیلاب متاثرین کو عطیہ کروں گا۔انہوں نے کہا کہ امید ہے یہ عطیہ پاکستان کے سیلاب سے سب سے زیادہ متاثر ہونے والے علاقوں کی تعمیر نو میں مدد کرے گا۔اسٹوکس کے مطابق 17 سال بعد پاکستان میں ٹیسٹ اسکواڈ کا حصہ ہونے پر بہت پرجوش ہوں، تاریخی سیریز کے سلسلے میں پہلی مرتبہ پاکستان آکر بہت اچھا لگ رہا ہے، کھیلنے اور سپورٹ گروپ کے درمیان ذمہ داری کا احساس ہے اور یہاں ہونا خاص بات ہے۔