میلبرن (این این آئی)ٹی ٹوئنٹی ورلڈ کپ میں پاکستان کے خلاف جیت میں کلیدی کردار ادا کرنے والے بھارت کے اسٹار بیٹر ویرات کوہلی نے بتایا ہے کہ انہوں نے پاکستانی کپتان بابر اعظم کے منصوبے کو بھانپ لیا تھا۔بھارتی کرکٹ بورڈ کی جانب سے ویب سائٹ پر ویرات کوہلی اور ہاردک پانڈیا کی ایک ویڈیو شیئر کی گئی

جس میں دونوں کرکٹرز نے پاکستان کے خلاف میچ میں اپنائی جانے والی تکنیک سے متعلق گفتگو کی۔ویرات کوہلی نے کہا کہ چار کھلاڑی جلد آئوٹ ہونے کے بعد جب ہاردک گرائونڈ میں آیا تو اس وقت میں بہت زیادہ دبا ئومیں تھا، میں اس نوعیت کے گیمز پہلے بھی کھیل چکا ہوں اور مجھے اندازہ ہے کہ پوری قوم کو آپ سے کس قدر امیدیں ہوتی ہیں۔انہوں نے کہا کہ ہاردک بے خوف کریز پر آیا اور اس نے آتے ہی مجھے کہا ہم نے صرف پارٹنر شپ بنانی ہے اور وکٹ بچانی ہے، بعد میں رنز بن جاتے ہیں، فی الحال کریز پر جمے رہنا ہے کیونکہ میں اس وقت بڑے شاٹس کھیلنے کے در پے تھا لیکن وہ خطرے سے خالی نہ جاتا۔ویرات نے بتایا کہ 10ویں اوور کے بعد وقفے کے دوران میں نے ہید کوچ راہول ڈریوڈ سے بات کی تو انہوں نے کہا کہ تم دونوں کا کریز پر ہونا بہت ضروری ہے، ہم صرف اپنی کرکٹ پر فوکس کر رہے تھے۔بی سی سی آئی کی جانب سے جاری کردہ ویڈیو میں ویرات نے کہا ‘میچ جب آخری مراحل میں تھا اور ہم نے دیکھا نواز کا صرف ایک اوور ہے اور ہاردک اسے آرام سے چھکے مار سکتا ہے، ہم نے وہیں بھانپ لیا تھا کہ بابر آخری اوور نواز سے کروائے گا اور فاسٹ بولرز سے پہلے بولنگ کروائے گا کیونکہ وہ لوگ پہلے ہی گیم کو کمزور کرنا چاہتے تھے۔کوہلی نے بتایا کہ میں نے ہاردک سے کہا کہ ہم اگر حارث رف کے اوور میں شاٹس کھیل دیں تو میچ ہمارے لیے سیٹ ہو جائے گا اور پاکستان گھبرا جائے گا، اور اتفاق سے یہ ہی ہوا جو ہم نے سوچا تھا، حارث کو جیسے ہی شاٹس پڑے وہ لوگ کمزور پڑ گئے۔