لاہور( این این آئی)سابق وزیر داخلہ شیخ رشید احمد نے کہا ہے کہ ملک کی ساری سیاست اہم تعیناتی کے گردگھوم رہی ہے،(ن)لیگ کی پارٹنرشپ ٹوٹنے والی ہے ۔ ٹوئٹر پر جاری اپنے بیان میں شیخ رشید نے کہا کہ ڈارروس اورچین کانام لینے سے پہلے شہباز سے پوچھ لیں۔
شہبازشریف توشوپیس ہے،فیصلے اور رابطے لندن سے ہورہے ہیں،جہاں مایوسی چھاگئی ہے۔انہوںنے کہا کہ رانا ثنااللہ کی بڑھکیں گلے پڑنے والی ہیں،دس یا پندرہ دنوں میں پتالگ جائے گا کال آتی ہے یا قال پڑتاہے۔دوسری جانب پاکستان تحریک انصاف کے مرکزی رہنما ،فوکل پرسن فوڈ سکیورٹی و خصوصی اقدامات جمشید اقبال چیمہ نے کہا ہے کہ قوم وزیر خزانہ سے کسی خوشی کی متمنی نہیں کیونکہ پی ڈی ایم حکومت کی خوشیاں پہلے ہی بہت بھاری پڑ چکی ہیں، حکومتو ں کو غیر معمولی فیصلے کرنے کے لئے عوامی مینڈیٹ کی ضرورت ہوتی ہے تاہم اگر ضمنی انتخابات کے نتائج کا جائزہ لیا جائے تو پی ڈی ایم حکومت عوامی مینڈیٹ سے محروم ہے اس لئے یہ بڑے فیصلے کرنے کی جرات نہیں رکھتی ۔اپنے بیان میں انہوںنے کہا کہ عوام نے ہمیشہ عمران خان کے مطالبات کی توثیق کی ہے اور17جولائی کے بعد16اکتوبر کے ضمنی انتخابات میں بھی عوام نے عمران خان کے مطالبات کی حمایت کرتے ہوئے تصدیق کی مہر ثبت کر دی ۔ انہوںنے کہا کہ وفاق میں بیٹھے حکمران جو مرضی کر لیں انہیں بالآخر عوام کا جلد انتخابات کا مطالبہ تسلیم کرنا پڑے گا، اس وقت معیشت ہچکولے کھا رہی ہے اور اسے استحکام دینے کے لئے عمران خان جیساوژن رکھنے والا لیڈر ہی دلیرانہ فیصلے کر سکتا ہے۔انہوں نے مزید کہا کہ پی ڈی ایم حکومت کی کوشش ہے کہ قوم ساری زندگی بھکاری رہے اس لئے انہوں نے اپنی ساری توجہ کرپشن کرنے اور قرضے مانگنے پر مرکوز کر رکھی ہے ۔
