لاہور ( این این آئی) صوبائی دارالحکومت کے علاقے ستوکتلہ میں دہرے قتل کی واردات میں بیٹے نے اپنے والد اور سوتیلی بہن کو قتل کردیا،انسپکٹر جنرل پولیس پنجاب فیصل شاہکار نے واقعے کا نوٹس لیتے ہوئے سی سی پی او لاہور سے رپورٹ طلب کر لی ۔

بتایا گیا ہے کہ مقتول غلام حسین کا اپنے بیٹے علی عمران سے جائیداد کے حوالے سے تنازع چل رہا تھا،واقعے کے وقت مقتول اپنی بیٹی ارزا کو اسکول چھوڑنے جا رہا تھا۔ باپ بیٹی دونوں کار میں سوار تھے کہ ملزم نے اندھا دھند فائرنگ کردی۔ پولیس کے مطابق موٹرسائیکل سوار ملزم نے 8سے 10گولیاں چلائیں، جس سے باپ بیٹی دونوں موقع پر جاں بحق ہو گئے۔ اطلاع ملتے ہوئے پولیس کی نفری موقع پر پہچ گئی اور جائے وقوعہ سے گولیوں کے 6خول بھی برآمد کرلیے۔دریں اثنا آئی جی پنجاب فیصل شاہکار نے واقعہ کا نوٹس لیتے ہوئے سی سی پی او لاہور سے رپورٹ طلب کر لی ہے ۔ آئی جی پنجاب نے سفاک ملزم کی گرفتاری کیلئے سپیشل ٹیم تشکیل دینے کی ہدایت کرتے ہوئے کہا کہ سیف سٹی کیمروں کی مدد سے ملزم کو ٹریس کرکے جلد گرفتار کیا جائے اور قرار واقعی سزا دلوائی جائے گی ۔انہوں نے ہدایت کی کہ سپروائزری افسران مقتولین کی فیملی کے ساتھ قریبی رابطہ رکھیں ،انصاف کی فراہمی ترجیحی بنیادوں پر یقینی بنائی جائے ۔