اسلام آباد (نیوز ڈیسک)پاکستان تحریک انصاف کے سابق رہنما اور عمران خان کے سابق میڈیا مشیر فیاض الحسن چوہان نے دعویٰ کیا ہے کہ کرتارپور راہداری کے افتتاح کے موقع پر سابق وزیراعظم کو تحفے میں ملنے والا خالص سونے کا لوٹا پیتل سے تیار کروا کر، اس پر سونے کی ملمع کاری کی گئی اور توشہ خانہ میں جمع کروا دیا گیا، جبکہ اصل سونے کا لوٹا اپنے پاس رکھ لیا گیا۔ایک انٹرویو میں فیاض الحسن چوہان نے بتایا کہ جنوری یا فروری 2019 میں کرتارپور راہداری کی افتتاحی تقریب میں اس وقت کے وزیراعظم، سابق آرمی چیف جنرل (ر) قمر جاوید باجوہ اور دیگر شخصیات موجود تھیں۔

اس موقع پر سکھ برادری کی جانب سے سابق وزیراعظم کو سونے کا لوٹا پیش کیا گیا۔ فیاض الحسن چوہان نے عمران خان اور ان کی اہلیہ کا نام لیے بغیر انہیں لالچ اور حریص مزاج کا حامل قرار دیا اور کہا کہ تحفے میں ملا قیمتی لوٹا راولپنڈی کے صرافہ بازار میں پیتل کے لوٹے سے بدل کر، سونے کا پانی چڑھوا کر توشہ خانہ میں جمع کرایا گیا۔

انہوں نے مزید الزام لگایا کہ ملائیشیا سے ملنے والا ایک قیمتی ڈنر سیٹ بھی راولپنڈی کے راجہ بازار میں فروخت کر دیا گیا۔ فیاض الحسن چوہان نے کہا کہ یہ شخص دعویٰ کرتا ہے کہ اس نے عزت، شہرت اور دولت سب کچھ دیکھا ہے، مگر حقیقت میں وہ لالچی اور موقع پرست ہے۔ ان کے بقول، “آج میں کھلے عام کہوں گا کہ یہ پاکستان کا واحد سابق وزیراعظم ہے جسے لوٹا چور کہنا بالکل درست ہے۔”