کراچی(آئی این پی ٗ این این آئی) انٹر بینک میں روپے کی قدر میں بہتری کا سلسلہ جاری ، انٹر بینک میں ڈالر 1 روپے 64 پیسے تک سستا ہو کر 224 روپے کا ہو گیا ۔ فاریکس ڈیلرز ایسوسی ایشن کے مطابق انٹر بینک میں ڈالر 1 روپے 64 پیسے تک سستا ہوگیا، ڈالرانٹربینک میں 224 روپے ہو گیا ہے۔
ڈالر کی قیمت کم ہونے سے بیرونی قرصوں کے بوجھ میں 200 ارب روپے کمی ہوئی ہے۔ واضح رہے کہ 22 ستمبر سے ڈالر کی قیمت میں 15.71روپے کی کمی ہوئی، 22 ستمبر کو ڈالر 239 روپے 71 پیسے پر تھا۔ دوسری جانب پاکستان اسٹاک ایکسچینج میں 100 انڈیکس میں 177 پوائنٹس کا اضافہ ہوا ہے، کاروبار کے دوران انڈیکس 41 ہزار 527 کی بلند ترین سطح پر پہنچ گیا۔دریں اثنا ڈالر کی قیمت مستحکم رکھنے کے لیے حکومت نے ایف آئی اے کو ٹاسک دیتے ہوئے مشتبہ منی چینجرز اور حوالہ ہنڈی کرنے والوں کے خلاف فوری کریک ڈائون کی ہدایت کر دی ہے۔تفصیلات کے مطابق ڈی جی ایف آئی اے کے چیف آف اسٹاف کے دستخط سے زونل دفاتر کو ایک مراسلہ جاری ہوا ہے، جس میں مشتبہ منی چینجرز اور حوالہ ہنڈی کرنے والوں کے خلاف کریک ڈائون کرنے کی ہدایت کی گئی ہے۔ڈالر کی اسمگلنگ روکنے کے لیے اقدامات کا فیصلہ وفاقی وزیر خزانہ کی سربراہی میں اجلاس میں ہوا۔ مراسلے میں کہا گیا کہ ڈالر کی قیمت میں یومیہ بنیادوں پر اتار چڑھائو سے معیشت پر منفی اثرات پڑ رہے ہیں۔مراسلے کے مطابق کریک ڈائون کی ہفتہ وار رپورٹ ڈائریکٹر ای سی ڈبلیو کو ارسال کی جائے گی، کارروائیوں کی آڑ میں ممکنہ کرپشن کی روک تھام کے لیے زونل ڈائریکٹرز نظر رکھیں گے۔
