پشاور( مانیٹرنگ ڈیسک)خیبر پختونخوا حکومت نے دبئی ایکسپو پر صوبہ کے سرکاری خزانہ سے کروڑوں روپے خرچ کردئیے ہیں، روزنامہ جنگ میں گلزار احمد خان کی خبر کے مطابق سرکاری خزانے پر صوبائی وزرا سمیت

سات حکومتی عہدیداروں، محکمہ ٹورازم کے47ملازمین اور فنکاروں کے43رکنی وفد نے دبئی کی مفت یاترا کی تاہم کروڑوں روپے خرچ کرنے کے باوجود صوبائی حکومت خاطر خواہ سرمایہ کاری کے حصول میں کامیاب نہ ہوسکی ،دبئی میں106افراد کی رہائش و سفری اخراجات کی مد میں 4 کروڑ 18 لاکھ روپے ، ان کےٹکٹ اور ویزوں پر 2 کروڑ 20 لاکھ روپے اور فنکاروں کو ادائیگی کی مد میں 26 لاکھ76 ہزار خرچ کئے گئے ہیں، اس بات کا انکشاف صوبائی محکمہ صنعت و حرفت کی جانب سے جاری کردہ تحریری دستاویز میں کیا گیا ہے جس کے مطابق دبئی ایکسپو2020کا آغاز یکم اکتوبر2021سے ہوا اور31مارچ2022تک جاری رہا جس کا موضوع ’’ مستقبل کی تخلیق اور ذہنوں کو مربوط کرنا ‘‘تھا ، تمام صوبوں کو اپنی صلاحیتوں کے اظہار کیلئے ایک مہینہ دیا گیا تھا ، خیبر پختونخوا کا مہینہ جنوری2022تھا، ایکسپو صرف ثقافتی تقریبات تک محدود تھا لیکن اگست 2021میں سرمایہ کاری کی صلاحیت کو شامل کیا گیا۔